Editor Picks


widgeo.net

Wednesday, June 20, 2018


# Ram zawng laiah kan chhuang e, kan chênna,
Boruak thiang leh Zo thlifîm a lêng,
Dam diaiin min chhêm a,
Dam diaiin aw, min chhêm a, dam diaiin.
(Dam diaiin, dam diaiin min chhem a,
Dam diaiin min chhem a,
Dam diaiin aw, min chhêm a, dam diaiin).

# Hmânah tukram chul \um kawng va fangin,
Siktui thiang maw, ngai te‟n luang ri her;
Dâwn leh nâng zo tui thiang,
(Dâwn leh nâng e, zo tui thiang, siktui thiang.
Dâwn leh nâng, dâwn leh nâng, zo tui thiang.
Dâwn leh nâng zo tui thiang.
Dâwn leh nâng e, zo tui thiang, siktui thiang).

# Kha leh chena kan hrilhfâk Zo nun mawi,
Hei ngei hi aw, Zo hnam nun ze mawi,
Chuai lo ten vul reng la.
(Chuai lo te‟n aw, vul reng la, chuai lo te‟n,
Chuai lo te‟n, chuai lo te‟n vul reng la,
Chuai lo te‟n vul reng la,
Chuai lo te‟n aw vul reng la, chuai lo te‟n)

# Zofa lêng zawng lungrualna, Zoram nuam,
Zalêng naufa lungruala lêngin,
Dam lai pâr kan tlân e.
(Dam lai pâr aw, kan tlân e, dam lai pâr,
Dam lai pâr, dam lai pâr kan tlân e,
Dam lai pâr kan tlân e,
Daml lai pâr aw, kan tlân e, dam lai pâr)

Sunday, June 10, 2018

ZOHNAMTE BIBLE AIA RIL PATHIAN THU KAN NI.


Phone ; 9612207107
 
Pathian thu hi ziakah nge a awm nihna ah? Ziaka awm a ngaitute chuan, eng hunah mah Pathian thu an hre fiah ngai lo ang
     Bible ziak awm hma daiha Zofate hi khawvela lo awm tawh kan ni a, kan chanchin hi ziakin a awm reng reng lo mah se, Pathian engkim siamtu kut chhuak kan ni a, ziak loh Pathian thu awmsa reng chu kan ni.
Pathianin min siam dan zawng zawng leh kan chenna tur ram min pek te nen vek hian, “PATHIAN THU” ziah chawp ni lo, sawi chawp pawh ni lo, a niha kan nihna, a taka kan chenna, Pathian thu dang lam ngailo chu kan ni.
            Miin, Pathian thu a lo awm a nih leh, a nitin nun leh eizawn dan leh a hna thawh te chu, Pathian remruat leh Pathian thu a ni tih a hriat lo a, Pathian thu hran, Pawm hran leh rin hran a neih vaih chuan, Pathian thuah chuan kawng a bo daih a ni.
            Miin, Pathianin a duh taka a siam a ni tih a hriata a chenna tur ram a pek ah a chêng a ni tih a inhriat a, hna thawh theihna a neih pawh Pathian thu a ni tih a hriat a, a hnathawh te chu Pathian thu a ni tih a hriat bawk chuan, Pathian thu a awm, Pathian thu a ding a ni.
            Zohnam te hi ziak Pathian thu ah ni lo, nihna Pathian thuah kan ṭhan harh leh hunah chuan
M.L.A rual te hian an hna te hi Pathian thu a ni tih an hre vek tawh ang a, duhsak bik leh bik loh a nei ngai tawh lo a nga, dik taka a thawh chu an tihtur a ni tih hriain, Pastor te rawngbawlna aiin, an MLA hna chu Pathian rawngbawl naah  a te chuanglo a ni tih hriain, tih dik loh an hlau hliah hliah tawh ang.
Sawrkar hnathawk mipui rawngbawltu zawng zawng pawhin an hna thawh chu Pathian pek a ni tih hriaiin, sawrkar hmanga mipui tana Pathian thu hriltu, “Tawng a hril loin,” a taka thawk a hriltu, Evangelist te aia te chuang lo, a taka thawk a, Pathian thu sawitu an ni tih an inhre vek tawh ang. Chuvangin dik tak rinawm takin an thawk tawh ang.
Mi zawng zawng hian kan nitin  nun leh thil tih te hi Pathian rawngbawlna a ni tih kan hre vek tawh ang a.
“THU” Pathian thu a nei lo a. “NIHNA” Pathian thu a kan neih hunah chuan, Kan in rinawm siak tawh ang a, kan in dik siak tawh ang.
Chu chu Pathian mian siamtu min siamtu duh zawng a ni tih kan hre vek tawh ang. Khawtlang roreltute leh rampum roreltu an rinawmin an dik vek tawh dawn avangin, rorel sual an nei ngai dawn tawh lo a ni.
Hetih hunah hi chuan Zoram chu khawvel ram nuam ber leh thlamuan awm ber ram a lo ni tawh ang.

KRISTIAN HNUA ZO NUNA THIL LO AWM THAR TE


Kan Zo nuna  la awm ngai lo, kristianna avanga thil lo awm thar te chu ;
            Kohhran pawl hrang tam tak lo awm tharin, thurin(Doctrine) hrang tam tak a lo piang thar a. Pathian bia a ṭawngṭai ve ngai lo, Nun leh thiltih a Pathian be zawk ṭhin kha, tunah chuan ṭawngṭai a Pathian au hnamah kan lo awm thar ta.
            Pathian Biak in nei hran ve ngai lo, an thil tih tinreng hmanga Pathian be mai ṭhin kha, tunah chuan Pathian biakna Biak in lian pui pui lo awm ta te.
            Hlim lam leh ṭawnghriat loh leh thu hrila vah vel te a lo awm thar bawk a. Thawhlawm thawh ruih ruih leh Pastor hlawh tamtak taka rawih te a lo awm thar bawk a. Inkhawm tluk tluk te hi Pathian biakna pawimawh a ngaih takna te a lo awm thar ta hlawm a.
            Khing Kristianna avanga lo awm thar te khian Zohnam nunah ṭhatna leh diknaah min hruai thleng thei chuang reng reng si lo.
            Sawrkar hnathawk zawng zawng te, contractor rual te, Politician ho te, sumdawng leh kut hnathawktu zawng zawng te pawh kristian vek an ni a.
            Nitina an hnathawh ṭheuhah leh an nun dan ṭheuhah hian, Isua nun a lan felfai leh failoh chu kan hre ṭheuh si a.
            Tuna Zohnam Kristian nun ah hi chuan a beidawn thlak tak meuh a ni. Isua zuitu Kristian te ah hian Isua keu chhuah tur awm in a lang lo.
            Chuvangin min siamtu Pathian Chungkhuanu in kan hnam nuna a dah (Kristianna in a lo hnawl hnu) tlawmngaihna te, rinawmna te, dikna te, midang ṭanpuina nun te kha Pathian thutak a ni tih hriain, Zohnam ah tungding leh ila.
            Miram chanchin hmanga in hrai puar kan tumna hi bansan tawh bawk ila, kan ram Zoram leh kan hnam Zohnam te hi Pathian thu kan ni tih hi Biak in tinah inzirtir ila, kan hnam hi i chhanchhuak leh hram ang u.
            Pathianin khawvel hnam tinte min din a, chenna ram min pe a, hnam nunzia min pe ṭheuh a, hnam tin te tan chu chu Pathian thu a ni.
            Keini Zofate pawh hnamah min din a, chenna tur ram min pe a, hnam nunzia ropui tak tak leh hnam thuam te min pe a, sem sem dam dam, ei bil thi thi te leh mailing um ve ngai lo tih te leh thil hlu tam takin min thuam a.
            Zoram hi zofate tan Pathian thu ding reng kan ni a. Pathianin a duh taka a din hnam kan ni a, Pathian thu kan ni.
            Mahni ram leh hnam hawisana, miram leh hnam chanchin Pathian thua nei tan, hnamah ṭhatna leh dikna leh rinawmna beisei tur a awm lo.
            Pathian khuanu min pek kan Zoram hi Zofate tan Pathian thu dingsa reng a ni tih kan hriat vek hunah chuan, ram pawi hi tuman an khawih duh ngai tawh lo ang.
            Zo hnam hi Pathian Khuanuin a duh taka a din hnam kan ni a, a thua awm kan ni tih hi i hre chiang mawlh ang u.
            Isua kan fak a, kan zai a, kan lam mup mup a, nuam kan tie m em a. Nimahsela, ṭhatna leh dikna leh rinawmna kan par chhuah pui chuan si loh chuan
            Isua hi fak hauh lo ma hila, zai hran lem lo mah ila, hnam hi kan rinawm a, kan dik tlat bawk chuan, kan biak Pathian tan a lawmawm zawk ngei ang.

ṬHATNA LEH DIKNA (Khawvel hnamtin mamawh)


MIIN : Isua avanga ṭhatna leh dikna a chharin.
MIIN : Râma avanga ṭhatna leh dikna a chharin.
MIIN : Buddha avanga ṭhatna leh dikna a chharin.
MIIN Mohammed avanga ṭhatna leh dikna a chharin.
            Chutiang zel chuan, tuvang pawhin, ṭhatna leh dikna mi tu pawhin char se, ṭhatna leh dikna reng reng chu a hlu em em vek a ni.
ZO HNAM : Keini Zo hnam bikah chuan, Isua te, Râma te, Buddha te, Mohammed-a kan hriat hauh hma a, kan Zo hnam nun chu hetiang hi a ni: Tlawmngai tlat hnam, Rinawm leh dik tlat hnam, inṭhenawm khawven thuah leh khawtlang nun ah ṭhatna inchhuah tawn tlat hnam kan ni a.
            He Zonun mawi hian hnam pumpui leh mimal tin nun a fang chhuak a. Zohnam nunah chhawm alh hluah hluah a ni a, ṭhelh mih rual loh a Zohnam tuam tlat ṭhintu, hnamin a pian chhuah pui, kan za a kan nuna inphûm fel sa tlat, inzirtir thar ngailo khawpa hnamin a nunphunga a kalpui sa a ni a.
            Kan Zohnam awi tleitu leh thlamuan tlattu, hnam lungrualna a min phuarkhawm tlattu Zonunmawi a ni a. Kan chhar chawp a ni lo a, hnama min siamtu Chungkhuanu min sin tir a ni a.

Sunday, October 8, 2017

TAWNGTAINA

V.L. Ngaihmawia

          Tawngtaina hi tun tumah chuan i han khel ve thung ang u hmiang. Zoram Kristiante hian tawngtai hi kan uar hle mai a, zing thawh hlim te, tukthuan ei dawn te, zanriah chaw ei dawnah te, mut dawnah te kan tawngtai awl lo a nih hi. Chuti ang chu kan awm phung a nih avangin tawngtaina awmzia hi eng nge ni tih kan zir dawn a ni.

A tobul-
          ‘Tawngtai,’ tih hi Mizo tawng a nih angin a awmzia han sawi fiah dawn ila. Hmasanga kan pi leh pute kha Kristian an nih hmain sakhua an hmannaa Khawzing Pathian biaa a hnena thil an hlan laiin puithiam(sadawt) khan thiam hla chhamin a phun bel bel(a chhamphual) a, chu chu ‘Tai,’ an ti. A lam rik danah chuan miin an loah buh chi khat an chin, ‘Tai’(thar rang), an tih Favang, October thla vela thar chi an lam dan anga tawi deuh hata lam rik tur a ni. ‘Tai’ tih hi thluk fan(sei) a nih chuan a dik thei lo a, ‘darh,’ tihna a ni daih dawn a, a awmzia a bo dawn a ni. He tawngkam, puithiamin Khua Pathian hnena thil a hlan laia ‘a tai,’ an tih atang hian  Zoam Kristiante’n Isua hnena malsawmna dila an maimitchhinga an phun mawlh mawlh hi, ‘Tawngtai,’ an lo vuah ta a nih chu. A nih loh leh tawngtaina awmzia chu eng nge ni teh reng le?

Monday, September 25, 2017

THIL TAK LEH TAK LO FIAH RAWH, PATHIAN CHU HMUSIT SUH

                                                                                                                     Ph: 9612207107
1. Pathianin a mihring siamte awhna tur thang a kam em ni?
2. Nupa thei ei avangin, mihring lo piang zawng zawng leh lo la piang tur zawng zawngten Pathian lakah thiam loh changin, mi sual kan nih phah vek em ni?
3. Pathianin duh taka a siam mihringte Vanrama an kalna tur leh Hremhmun (meidil)-a an kalna tur kawng a siam tak tak i ringa maw?
4. Pathian engkim siamtu hi, Ama thil siam mihringah a rawn pian ve leh kher ngaiin, kawng a ruahman tak takin i ringa maw?
5. Pathian hian mihring Adama nupui tur Ramsa zingah a zawng em ni?
6. Rul hi mihringte thlem thei turin a tawng theih tak tak i ringa maw?
            Heng zawhnate hi i duh phawt chuan ringin i pawm hmiah thiang a. I duh phawt chuan, ring miah loin i awm thiang bawk.
             I rin miah loh leh i rin em emna khan nangmah leh Pathian inkarah, kawngro su pakhat mah a awm chuang lo.

Friday, August 25, 2017

KRISTIANNA ATANGA KAL SUALNA

                                                                                                                                       V.L. Ngaihmawia

           Khawvela sakhaw hrang hrang awm zingah hian Kristian hi an lian ber rih a, Kristian zirtirna hian khawvela hnam tam tak hi an rilru a kal sualtir nasa hle mai a, rinna dik loah a dintir nasa hle a ni tih hi chhui tham fe a awm a ni. Eng dinhmunah nge i awm lo inchhut chiang teh le.

          A hmasa bera ka han sawi lan duh chu kan chenna khawvel hi a mum a, tuipui zau pui pui panga leh tuifinriat engemaw zat a awm a, chung karah chuan khawmualpui lian tak tak paruk leh a te deuh engemaw zat bakah thliarkar  lian deuh te leh te reuh te te tam tawk tak a awm bawk a ni. Hengah hian hmakhawsang ata tawh mihring an lo cheng reng tawh a, nimahsela chung khawmual tam taka mihring chengte chuan inkalpawhna tur thlawhtheihna emaw, rel(train) emaw, motor emaw, lawng emaw an la neih loh avangin kum sang tam tak chhung kha anmahni lo chu khawvelah mihring dang an awm ve tih pawh hre loin an awm reng thin a ni.

Sunday, July 30, 2017

MALSAWMNA

 1.   Lalpa hming avanga khawvel êng hmutute,
 2.   Kan Pathian malsawmna ka entir ang che u.
 3.   Engtin nge vawiin ni thlenga malsawmnaa in dil?
 4.   An thiltih tluan ṭuma malsawmna ngai a, an beisei ang leh duh ang a thlen loh   ṭuma malsawm lohnaa ngai ṭhintute u.
 5.   Lalpa kan Pathian chuan chatuan atan nun nihnain mal min sawm a.
 6.   Dilnawn ngai lovin kan chatuan chanpual a lo ni ta.
 7.   Malsawmna kim ka dawn tâk hi.
 8.   Khawvel thil malsawm dan ka entir ang che u.
 9.   Thil engkim mai hian,
          An theihna sang berin mal min sawm a,
          Kan beisei ang hlawhtlinna leh hlawhchhamna hi,
          Malsawmnaah a chang zo ta.
10. Khawvêl miten ka chunga an tih theih sâng ber hi, ka tân malsawmna a ni e.
11. Tisa thila hlawhtlinna, Pathian malsawmnaa ngaitute u, 
        Lal hriatna reng nei lote hausakzia hi thlir teh u.
12. An thiltih zawng zawnga hlawhtling ṭhinte,
        Lal malsawmnaah lei retheihna a tel si a.
13. Tunah chuan engkim kan pualah a chan tâk hi.
14.  Aw Lalpa chatuan atan i malsawmna kim,
        Ka hmuh tâk avangin ka fak a che.
15. Ropuina leh chawimawina, thuneihna leh lalna chatuanin i ta a ni e.