Editor Picks


widgeo.net

Sunday, September 14, 2014

NU LEH PA CHUNGCHANG

1. Nu leh pa te hi kan tan eng nge an hlutna?
    = Siamtu Pathian ruat anga mihringa min siamtu, kan tana 
        Pathian hmuh theih an nihavangin an hlu em em  a ni.
      
2. Nu leh pa zah loh hi eng nge a pawina?
    = Nu leh pa zah loh hi Pathian zah lohna, vanduaina leh thlahte  
        thlenga anchhe dawntheihna a ni.

3. Nu leh pa zah hi eng nge a hlutna?
    = Nu leh pa zah hi Pathian thuawihna, hmuingilna leh thlate 
       thlenga vanneihna a ni.

4. Nu leh pa enkawl hi eng nge a tulna?
    = Nu leh pa te hi mihringa min dintu an nih avangin enkawl let an 
        ngaih huna enkawl let hianmahni leh Pathian laka kan chanvo 
        a ni.
       
5. Engtin nge nu leh pa kan zahna kan lantir ang?
    = Rinawmna leh dikna vawng chunga nu leh pa in tih tur leh tih 
        loh tur min hrilh te tha taka kan zawm hian  nu leh pa kan 
        zahna kan lantir a ni.
      
6. Nu leh pa zah lo chu tute nge ni?
    = Nu leh pa thuawih lo te, vin ching te, an hming duhdah taka 
        sawi mai mai te, mi bum leh thilruk ching te hi nu leh pa zah lo  
        an ni a, ram leh hnam, khawtlang tan mi hnawksak anni
       
7. Pi leh pute hi kan tan eng nge an hlutna?
    = Pi leh pu te hi mihring kan nih theihna tura kan bulpui, nu leh 
        pa min petu an nih avangin an hlu em em a  ni..
      

NAUPANGTE LAL CHAWINA

Ka thu ngaitute u, ka hrilh a che u,
Kan Pathian thil rel dan hi a va ropui em!

Kei ni naupangte tan, kan lei malsawmna famkim chu
Kan nu leh pate hnenah dahin a awm a.

Kan nu leh pate zah thiam mia siamin kan awm ta.

Lal ruat danin kan nu leh pate hi,
Kan lei hmuh theih Pathian chu an lo ni e.

A nu leh pa hmusita tiduhdah mi chuan,
A lei malsawmna a um bo mek a ni.

A nu leh pa chawimawi mi chuan,
Malsawmna a khawlkhawm mek a ni

Kan nu leh pate an awm lohin,
Kan Pathian chu kan tan nu leh paah a ding si a.

Ka nu, ka pa, ka u zirtirna tha  min pe la, i thu ka zawm ang;
Ka lo puitlin thlenga hmantlakah min siam ang che.

Ka fel lohin min zilh la,
Felna kawng min kawhhmuh ang che.

Ka entawn thin che avangin,
Ka mit hmuhah entawntlakin awm ang che.

Khawvel leh ka lalram chu,
Hlimna famkima ka hman theih nan

Thursday, September 11, 2014

THIANG LEH THIANG LO NGAIH PAWIMAWH ṬULNA


  Mizo pipute kha sakhua la urhsun tak hnam an ni ṭhin a, Kristian an la nih hma, kum 1894 hma lamah phei kha chuan an puithu hle ṭhin a ni. An puithuna em em chu thiang leh thiang lo an ngahin an ngai pawimawh em em ṭhin. Chu thiang leh thiang lo chu ngai pawimawhin, an tu leh fate chu tukṭhuan an ei honaah te, zanriah an kil honaah te leh an mut hmunah te an zirtirin, an taksa len leh kum upat ang zela an hriat thiam theih tawk tur ang zelin, an ṭawngka chang lo, an nun pawhin an zirtir ṭhin.
         Chuti anga an zirtir avang chuan an lo ṭhan lenpui a, chu chuan an tu leh fa chhuan lo awm zelte chenin an nunphung leh khawsak dan zawng zawng a thunun tlat a, chu thununna chuan an nunah a ṭha zawnga hna a thawh leh a nghawng chhuah chu ropui tak a lo ni a, an kiang vela hnam dang awm ve te leh Mingo he ram rawn luh chilh a, an hnam nun chik taka rawn zir chhuaktute thinlungah pawh khati taka hnam mawl A Aw B pawh nei silo chunga an nun leh khawsak dan ena hnam fing tak ni tawh khawsak leh inrelbawl dan ni awm taka an nung si kha ngaihsan loh theih lohna a awm reng a ni.  

Wednesday, September 3, 2014

SAKHAW CHUNGCHANGA INKAWMNA - 7


47. Zawhna   : A nih leh Israel hnam sawm bo an sawi fote hi tute nge an nih a, khawi laia awm nge an nih le?
    Chhanna   : Kum B.C 1200 bawr vel khan Israel-hote chuan Aigupta sala kum 430 an ṭan hnuin Palestina ramah an lo kir leh a; roreltute hnuaiah an awm hnu khan lal neih an duh ta a. Zawlnei Samuela chuan Israel lal hmasa ber atan Saula chu hriak a thih ta a ni. Lal Saula dawtah Davida a lal leh a; tin, Davida fapa Solomona a lel leh a. Solomona a thih chuan Rehoboama a lal leh a, hei hi B.C 931-913 vel niin an ziak
                             Heng hun lai hian Palestina ram chhim lamah chuan Juda hnam te, Levi hnam te leh Benjamin hnam te an cheng ber a, chungte chu “Israela,” an tih Jakoba fapa 12-te zînga Juda thlah te, Levia thlah te leh Benjamina thlahte kha an ni. Tin, Palestina ram hmâr lamah chuan Reubena thlah te, Simona thlah te, Isakara thlah te,Gebuluna thlah te, Josefa fapa pahnih Manasea thlah te leh Ephraima thlah te, Dana thlah te, Naphtalia thlah te, Gada thlah te leh Asera thlah te an cheng leh ber a, chûngte chu Jakoba fapa pakuate thlahte chu an ni. Jakoba fapa naupang ber Josefa hian Aigupta ramah khan fapa pahnih a lo nei hman a, chu mite chu Manasea leh Ephraima an ni a, chuvang chuan Josepha thlahte hi hnam hnih angin an sawi ṭhin a ni.Chutichuan Palestina ram chhim lamah hnam thum an cheng a, hmâr lam ramah hnam sawm an chêng a nih chu.