NGAIHTUAH CHIAN ATAN

HRILH HRIAT CHAWP NGAI LO PATHIAN.

Ṭawngṭaiin dil vak vak mah la,

Ṭawngṭai reng reng lo mah la,

            I siamtu enzawna i kal phawt chuan, i mamawh chu i chungah a thleng vek tho dawn. I siamtu Pathian chungkhuanu hian englai mahin a muthilh san lo che a, i hrilh chawp aṭanga thil ti chauh ani lova, englai pawhin i muthilh hlan pawhin a enkawl reng che a ni zawk.

TU THISEN MAHIN

ZOHNAMTE SUALNA A TLENG LO.

            Isua thisenin kan sualna a tlengfai tih hi inbumna dik tak a ni, tlengfai anih chuan sualna nei tawh lo a ni a, sualna la kawl vek si a, Pathian thinlungah tlenfai kan ni tawh tih phei hi chu, inbumna chhah lehzual a ni.

            Pathian thinlungah, sualna kawl reng hi eng lai mahin thianghlim a ni ngai reng reng lo, sual chu sual, ṭha chu ṭha ani ringawt mai a ni.

            Pathian chungkhuanu hian englai mahin lem a chang ngai lo, mihring lemah pawh a rawn chang bawk hek lo. A Pathian nihna famkimin englai pawhin a ding reng a ni.

PATHIAN NEN PUMKHAT KAN NI.

            Min siamtu Pathian Khuanu chu keimahniah, keini pawh Amahah, kan inkarah midang zeh lenna tur ram awl a awm reng reng si lova.

A MAKIN AVA ROPUI EM…!!

           Tu finna leh tu hriatnain nge chhuichhuak zo thei ang le? Han hawi vêl la, i hmel hmai leh i mit vêl chauha hawi loin, i hriatna zawng zawng nên thlîr vêl rawh le. Kan chên mêkna khawvêl lo awm dân ropui zia hi i hmu ang.

         Lungrual taka leilung leh tuifinriat zau pui awmho mup mup mai ropui zia te, boruak zau taka khawvêl an lang luau luau mai te, leilungte chu tuiin a buak zawh san duh chuang reng reng lo mai te leh leilung leh tuipuiin an enkawl thilnung zozai te ropui zia leh an puar khawpa an tlan tur chaw an hmu ṭheuh mai te hi ava ropui tehlul em!

        Boruaka thlawk kual vêl ringawta eikhawp hmu  te, leilung chunga an tlaina tûr khawp eitur(chaw) hmu an tam zia te, lei chhûng rila chêng chite'n an puarna tûr khawp chaw an hmu vek mai te, tui chhûnga chêng thilnung tinreng tam zia leh an tlaia an puarna khawp chaw an hmu ṭheuh mai te hi a makin ava ropui tehlul em!!

          Thli leh ruah te inrelbawl dan zawng zawng te leh a hun taka an tleh ṭhin dân leh an sur ṭhin dân te, thlipui chêt hun leh thlifim chêt hun te, ruahpuivanawn sur hun leh ruahthimpui lo haw hun leh ruahphingphisiau sur hun te nên lama a felfai zia te, ṭêk tla leh rial tla ten an hun an hai reng reng lo a. Tlangsang lama vûr tla(sur) sung sung mai te, chhûm zîng chhah mup mup lo awm dân leh ṭiauchhûm inrelbawl dan te, khawi lamah nge an bihruk zawh leh tak hriat hauh loa an bibo leh duak mai ṭhin te, lirnghingin khawvêl a chin buai dan te leh thlipuiin manganna a rawn thlen dân leh tuilianin leilunga chêng a tih mangan dân te han thlir vêl la, an mahni hian rilru nei rana an duh dâna hna rawn thawk ṭhin niin an lang hauh silo a, thiam loh chantîr dâwn ila, "Kan duh thua ti kan ni lo, remruattu thu anga che mai kan ni,” an ti ngei dawn si a.