Editor Picks


widgeo.net

Wednesday, October 10, 2012

KRISTA LO KAL LEHNA CHUNGCHANG

Isua


            Tun lai Kristiante hian Krista lo kal lehna hi an nghak thup mai niin a lang a. ‘Krista,’ an tih chu Pathian fapa mihringa lo chang kros-a an khenbeh hlum tak Isua kha a ni a, Judate chuan ‘Messia’ an ti a ni. Pathian mihringa lo chang nia an puh Isua kha khawvela a len lai ni kha a lo kal vawi khatna niin an ngai a.Kristiante ngaih danah chuan a thi a, a tho leh a, vanah a lawn ta a; a lo kal vawi khatna chu a zo ta a, nakinah a lo kal leh ang, an ti.
Isua chu vawi hnihna bak a lo kal nawn fo lo ang-    
            Eng vangin nge lo kal leh tura an ruat le? An thurin bu Bible-ah hian a lo kal leh tur thu hi hmun tam takah ziaka a awm vang a ni. ‘Lalpa,’ tih ringawt hi Bible-ah hian vawi 1855 lai a awm a, ‘Lalpa lo kal lehna,’ tih hi vawi 1800 zet a awm a ni. Krista lo kal leh tur thu hi kan sawi tawh angin vawi tam tak inziak mah sela, a lo kal vawi hnihna tur a ziah thu hi vawi khat chiah kan hmu a, a lo kal leh vawi thumna emaw, vawi lina emaw, a aia tam emaw lo kal leh tura ziahna phei chu kan hmu tawh hauh lo thung a ni. Krista lo kal leh vawi hnihna tur a ziak chiang taka vawi khat chauh kan hmuhna chu, ‘...Chuti ang bawkin Krista pawh mi tam tak sualte kalpui tura vawi khat hlana awm tawhin, chhandamna hmu tura amah lo nghaktute hnenah chuan sual tel loin vawi hnihnaah a lo lang leh ang,’ tih kan hmu(Heb.9:28). Heta kan chhinchhiah tur thil pawimawh tak tak pahnih awm chu- ‘Sual tel loin,’ tih leh, ‘Vawi hnihnaah,’ tih hi a ni. Krista lo kal lehna nghaktute’n an nghah thlawn dan i lo enkual den den phawt teh ang.
1.         A hmasa berah chuan Isua’n, ‘Krista derte leh zawlnei derte an lo chhuak dawn si a,’ tia a sawi ang deuh khan Europe khawmualah indona a awm fo laiin Judate chu an retheiin ram tinah an tlan darh a, an mangan nasat poh leh Messia an beiseina chu a sang tial tial thin a ni. Chutih lai hun velah khan ‘Messia ka ni,’ lo inti tawk an tam a, Messia beiseitute chuan Messia chu a lo kal hunah chuan an retheihna ata leh an hmelmate lak ata chhanchhuak tur leh kum 1000 Lalram rawn din turin an ruat tlat a ni. Chung hun lai chuan Juda mi pakhat Sabutai Zevi chuan Messia nia inchhalin kum 1666-ah Jerusalem-ah Lalber anga lo kalin kum sang Lalram din turin a insawi a, chu pa chu Messia beiseitu tam ber chuan Messia ni ngeiah an ruat tawh a, zuitu pawh a ngah hle a ni. Messia lo kal hnaih beiseitute chuan an zalenna ni leh Messia an beisei hlawhtlinna ni chu lo hnai tial tialin an hria a, harsatna leh tihduhdahna an tuarna karah pawh lawmin an zaiin an lam thei hial tawh a ni.
            Nimahsela chuti anga Messia ni ngeia ruattute’n a lo kal leh hun leh kum 1000 Lalram a rawn din hun hnai tawh hlea an hriata hlima an zaia an lam mup mup lai chuan Messia nia an ruat Sabutai Zevi chu kum 1666 a lo thlen meuh chuan Jerusalem-ah Lalber anga lo kal ta lo chuan Contantinople-ah a kal ta daih mai a. Chutah chuan Turks lalpa chuan lo manin tan inah a khung ta hmiah mai a. Messia lo kal beiseitu hmasate beiseina hun leh ni leh kum chu a thlawnin a liam ta duai duai mai a ni. 
2.         Bible-ah chuan, ‘A tirin Pathianin lei leh van a siam a,’ tiin a thu a intan phawt mai a(Gen.1:1). Chuti chuan Pathian chuan a thil siam zawng zawng chu ni ruk chhungin a zo a(Gen.1:31), ni sarih ni chuan a chawlhsan ta tih kan hmu leh a(Gen.2:2). Dr.Livefoot-a leh James Ussher-a chuan Pathianin khawvel a siam zawh hun chu kum B.C.4004 kha niin an chhut a. Ni ruk chhunga engkim siam zawh a nihna chu ni khat chu kum sangkhat ang zelin an chhut a(II Pet.3:8; Sam 90:4). Pathianin ni ruk chhungin engkim a siam zo a, chu chu kum 6000 anga chhutin a ni sarih niah a chawl a, chu chu kum 7000 lo inher chhuahna turah an ruat a ni. Chuti anga an chhut chuan khawvel siam zawh ni chu Khuangchawi thla(October) ni 23/26, kum B.C. 4004 niin Ussher-ate khan an chhut a; chuta tanga chhut chuan ni 23/26 Khuangchawi thla(October), 1994 kha kum sangkhat Lalram rawn dinna tur niin an ngai a nih chu.
            Chuti chuan ni 23 Khuangchawithla(October) 1994 chu khawvel tawp hun tur leh Lal Krista hoa kum 1000 Lalram din hun turah ngaiin hlim leh phur takin an thlir a, nghakhlel em emin an awm a, a lo thlen dawn hnaihah phei chuan khawthlang rama mi thenkhatte phei chuan chu mi ni chu an lo hmuak nasa hle a ni ang, special cake te pawh an lo siam hial a ni awm e. Nimahsela chu mi hun tiam ni 23 chu a lo thlen meuh chuan engmah thil danglam hmuh tur reng reng a awm leh ta chuang lo a. ‘A, ni 26 zawk hi a ni ang e,’ an ti a; chu mi ni pawh chu thil engmah danglam chuang awm si loin an nghakhlel thlawn leh ta duai duai mai a nih chu. Krista lo kal thu leh thil mak danglam engmah a awm leh ta chuang lo a ni.
3.         A dawt lehah chuan America ram zawlnei, thil lo thleng tur hrilh lawk dik zet thina mi tam takin an ngaih leh an sawi huai huai chuan a thil khai, khawvel(Glob) anga mum hmang chuan thil lo thleng tur chu a sawi lawk thin niin an sawi a; a thil hrilh lawk tawh reng reng dik lo a la awm ngai lo niin an sawi a ni. Chupa hming chu Nostradamus-a a ni a, ani hian German Dictator hlui Adolp Hitler-a pawh kha a naupan laiin kawngah a tawk a, bawkkhupin chibai a buk a. Miin an lo hmuh chuan, ‘Eng vangin nge kha naupang kha khati anga chibai i buk le?’ tia an zawh chuan, ‘He naupang(Hitler-a) hi mi ropui tak a lo la ni dawn a ni,’ a ti niin an sawi. A sawi ang ngei chuan German dictator ropui tak a lo ni ta a, khawvel indopui chawk chhuaktu a lo ni ta hial a. Nostradamus-a chuan kum 1999 thla 7-naah khawvel a tawp dawn niin a sawi a ni awm e. Chu thu chu Kristian tam takin an ring ta em em mai a, “Nostradamus-a hian a kum leh a thla chiah a sawi a, a ni tur a sawi tel lo a; Isua pawhin, “..Chu mi ni leh a hun tur chu tuman an hre lo,”(Matt.24:36,42; Mark.13:32;Tirhkohte.1:7)a ti chauh reng alawm, hepa(Nostradamus-a) sawi hi a dik ngei ngei ang,’ tiin an ring hle a ni.
            Nimahsela chuti ang Kristiante beisei, ‘Krista lo kal lehna leh khawvel tawpna lo thleng mai tura an nghah chu a lo thlawn leh ta pek a, an beisei ang chuan a lo kal leh ta lo phawt chu a ni. Lo kal leh tura insawi Isua hian dawt a sawi nge ni ang, amah beiseitute’n a lo kal leh dan tur an beisei dan zawng a dik lo zawk ni ang le?
4.         Beiseina pakhat a la awm, Kristian mi thenkhat chuan khawii ziaka an hmuh  nge chu ka hre hauh lo a, “Isua’n, ‘Kum sanghnih bak ka thang lo ang,’ a ti,” titu leh, ‘Kum sanghnih aia rei ka thang lo ang,’ a ti,” ti an awm bawk a ni. Chu pawh chu ziak lo awm teh reng pawh ni se, tunah kum 2012 lai chu a lo liam leh ta. Tunah a lo la kal lo a nih chuan, ‘Ka lo kal thuai dawn e,’ ti si, a thuai  hi a rei ta hle a ni.
Sual tel loin a lo kal ta-    
            Kan thu hmasaah khan ‘Sual tel loin,’ tih kha a awm a; Kristiante’n chhandamtu Messia lo kal leh tur an nghah hi sual tel loa lo kal tur ni awm tak a ni. A lo kal hmasak tum khan mi sualah an puh a, thiam loh an chantir a, an tihlum hial a nih kha. A lo kal leh hunah chuan sual a tel tawh dawn lo a ni ang. A nih leh sual chu a tel em? Sual nei rengin a lo kal em i lo en teh ang.
            Isua’n a lo kal hun tur ni leh hun chu tuma hriat a nih loh thu a sawi a, “...Chu mi ni leh a hun thu chu Pa chauh lo chuan tuman, vana vantirhkohte pawhin, Fapa pawhin an hre lo,” a ti a. Luka pawhin a ziak dan chuan, “Tin, ani chuan an hnenah, ‘Pain a hun leh a ni, ama thu thua awma a ruat chu, nangni lo hriat tur a ni lo e,’....” a ti a. Chu mi dawt chiahah chuan, “Nimahsela Thlarau Thianghlim chu in chunga a lo thlen hunah thil tihtheihna in la nei ang .....,” tiin a sawi zawm nghal a ni. Chuti a nih chuan Thlarau Thianghlim an dawn kha amah Isua lo kal lehna angin a sawi a nih hmel hle a ni. Isua a thih atanga a ni sawmnganaah khan Thlarau  Thianghlim chu an chungah a lo thleng a nih kha(Tirhkohte.2:2-4). Thlarau Thianghlimin a lo kal a, chu tah chuan sual a tel si lo a; sual  tel chu sawi loh, mei angin an hnenah a rawn inlar a(Tirhkohte.2:3), anmahni pawh a rawn kang thianghlim ta zawk a nih chu(Thup.220:9).
A lo kal vawi hnihna chu-
            Pentikos nia a lo kalna kha a lo kal vawei hnihna chu a ni a, chu bak chu a lo kal tawh lo ang. ‘...Vawi hnihnaah a lo lang leh ang,’ tih ziak ang khan vawi hnihnaah chuan a lo lang ta ngei a, tu nge la awih lo cheu dawn le? Paula chuan, ‘Tupawhin Lalpa a hmangaih loh chuan anchhe dawngin awm rawh se. Kan Lalpa chu a lo kal e,’ a ti a(I Kor.16:22). Heta ‘Lalpa,’ tia a lam hi a hnenah chuan a lo thleng tawh ngei a, amah Paula hnenah chuan a awm reng tawh a ni. Tuna an hnena lo la kal ve lo leh Lalpa dang la nghak mektute chuan Paula Lalpa kha an hmangaih ve lo a nih chuan Paula anchhia chu an dawng ngei ang le. Paula Lalpa kha hmangaih ve ni sela chuan tun thleng thleng hian Lalpa dang chu an nghak tawh hauh lo ang maw le. Tun lai Mizo Kristiante pawh hian eng anga rei pawh nghakin kum sangkhat pawh damin nghak mah sela Paula nghah thlen Lalpa bak kha chu Lalpa dang an nghah thlen a rinawm chuang lo a ni, a lo kal vawi hnihna bak lo kal a tum tawh lo a nih si chuan.
A pathiannain a lo kal-
            A pathiannaa a lo kal bak chu mihring anga hmuh theihin a lo kal tawh lo ang.Isua chu a pathiannain a lo kal a, Pathian chu kan ral hmang mei a nih tlat avangin(Heb.12:29; Deut.4:24). Thlarau Thianghlima a lo kal avangin tisa mita hmuh chi a lo ni lo a ni ang, Isua’n Pathian chu thlarau a nih avanga hmuh theih a nih loh thu pawh a sawi, ‘Tuman eng lai mahinPathian an hmu lo,’ a ti(Joh.1:18; I Joh.4:12; Kol.1:15).
Pathian ram lo thleng angin a sawi-
            Tin, Isua lo kal vawi hnihna hi Pathian ram lo thleng angin a sawi bawk a. ‘Pathian ram chu hmuh theihin a lo thleng lo e,’ a ti(Luka 17:20). ‘Dik takin ka hrilh a che u, heta dingho a thente hi, Pathian ram an hmuh hma loh chuan thihna tem tawp lo tur an awm,’ (Luka 9:27; Mark.9:1) tih te pawh kan hmu bawk a ni. Khing kan Bible chang han tar lante khian Isua lo kal vawi hnihna chu a lo thleng tawh a ni tih min hriattir thei awm e. Mahse Kristiante zingah he Isua hi a lo kal leh tawh tih tu nge awih thei ang le? ‘Sual tel loin vawi hnihnaah a lo lang leh ang,’ tih a ni si a. A lo kal vawi thumna emaw, vawi lina emaw, vawi ngana emaw, chu mi aia tam pawh a sawi tawh lo; a vawi hnihna thleng chiah chauh a sawi a ni. Vawi hnihna atan a lo kal leh tawh a, chu bak chu a lo lang tawh lo ang. A vawi hnihna hi a tawpna a ni tawh dawn a, amah beiseia lo nghaktute hnena awm hlen tur a ni tawh dawn a ni tih Isua’n a hrilh(Joh.14:16, 23). A lo kal vawi hnihna hi a pathiannaa lo kal a nih avangin hmuh theih pawh a ni lo a ni.
Mi thianghlim 10000-te nen-
            Mi thianghlim rual tam takte nena a lo kal tur hrilh lawkna pawh kan hmu a, ‘Ngai teh u, mi zawng zawng chunga rorel tur leh Pathian ngaihsak lote zawng zawng Pathian ngaihsak lohna hna Pathian ngaihsak lo chunga an thawh zawng zawng kawngah leh Pathian ngaihsak lo mi sualte’n a chungah thu khauh tak an sawi zawng zawng kawnga thiam loh chantir turin Lalpa chu a mi thianghlim singkhatte nen a lo kal a ni,’tih kan hmu(Juda 14,15) . Hetah hian mi thianghlim 10000 nena lo kal angin a sawi a; tin, ‘Isuaa muhil tawhte chu Pathianin ama rualin a rawn hruai ve bawk ang,’ tih kan hmu bawk a(I Thes.4:14). Isua lo kal leh hunah chuan mi thiamhlim rualte pawh hmuh tel ve an inbeisei a nih pawhin an hmu chuang hek lo ang. Isua chu thlaraua a lo kal khan mi thianghlim rual an hmuh an sawi tel ve lo tlat a. Paula vekin, ‘Lalpa ngei chu au thawm nen, vantirhkoh chungnung ber aw nen, Pathian tawtawrawt ri nen, van atangin a lo chhuk dawn si a,’ a ti a(I Thes.4:16). Hetah hian ‘au thawm ‘ te, ‘vantirhkoh chungnung ber aw’ te, ‘Pathian tawtawrawt ri’ te pawh Isua lo kal hunah hriat tel tur ni awm takin a sawi na a, a thiha a thawh leh hnua vana a lawn lai khan au thawm leh tawtawrawt ri nena chho angin an sawi a,
            ‘Pathian chu au thawm nen a chho a,
            Lalpa chu tawtawrawt ri nen a chho ta e,’
tiin an lo ziak a ni(Sam 47:5). Heti ang hian sawi mah sela, Isua chu vana a chhoh lai khan a zirtirte’n an en reng a, mahse au thawm leh tawtawrawt ri an hriat thu sawi a awm lo(Mark.16:19; Luka 24:51; Tirhkohte 1:9). Chuvangin Isua pawh hi a lo kal leh hun nghaktute hian au thawm te, vantirhkoh chungnung ber aw te leh Pathian tawtawrawt ri te chu an hre dawn chuang lo a ni.
Isua lo kal leh hmain an thi lo ang-
            Isua khan mi thenkhatte chu a lo kal leh hma chuan an thih hauh loh tur thu a sawi a. ‘Tih tak meuhin ka ti a che u, heta dingho a thente hi, Mihring Fapa(Isua) a rama lo kal an hmuh hma loh chuan, thihna tem tawp lo tur an awm...,’(Matt.16:28; Mark.9:1; Luka 9:27) tiin. Chung mite, a lo kal leh hma loha thi lo turte zingah chuan a hming mal man fak tur pawhin a  zirtir Johana ngei pawh a tel a ni tih chiang takin kan hre bawk a(Joh.21:22).
            Isua khawvela a len laia a thu sawi lai ding chunga a kianga lo ngaithlatute zinga ‘a thente,’ a tihte kha tuna Isua lo kal lehna la nghaktute hian zuk zawng ta sela, dama awm an zu hmu ang em le? An zinga chiang taka tel ve kan hriat Johana pawh savun uiha tuama an hnuha martara a thih tak thu kan hre bawk si a.
Isua ram chu khawiah nge-
            ‘Mihring Fapa(Isua) a rama lo kal an hmuh hma loh chuan....,’ tih kha kan hmu a, Isua chu ama rama lo kal tur a nih avangin a lo kal lehna nghaktute chuan ama ram loah chuan eng chen pawh lo nghak sela an nghak thleng dawn chuang lo a; chuvangin Mihring Fapa ram chu khawiah nge a awm tih hi kan hriat a ngai leh ta phawt mai a nih hi. Pontia Pilata hmaa a din lai khan Isuan eng tin nge Pilata hnenah khan a sawi kha? ‘Ka ram chu he khawvela mi hi a ni lo; ka ram chu he khawvela mi hi ni sela, ka thuihruaite’n an bei ang, Judate hnena peka ka awm lohna’n; nimahsela ka ram zawng heta mi hi a ni lo,’ a ti a nih kha(Joh.18:36). He khawvela mi hi a ram a nih loh avangin a thuihruaite pawh a hmelmate bei let turin a pun duh lo a, puna hnehin an man dawn lai pawh khan Petera’n a chem a han vilik hman a, mahse a paia khung tha turin a hrilh ta zawk a nih kha(Joh.18:10-11; Matt.26:51-54; Mark.14:47; Luka 22:50). Isua khan amah man tumtu a hmelmate kha duh sela chuan bei let turin a thuihruaite chu a pun thei reng a ni tih pawh a sawi niin Matthaia chuan a ziak a, ‘Tin, ngai teh, Isua hote zinga pakhat chuan a kutin a ban a, a khandaih a phawi a, Puithiam lalber bawi chu a sat a, a beng a sah thlaksak a. Tin, Isua’n a hnenah, “I khandaih kha a dahnaah dah leh rawh, khandaih ruaitute zawng zawng chu khandaih vekah an thi dawn si a. Tunah  pawh  vantirhkoh sangruk hmun sawm leh hmun hnih aia tam zawk mi rawn tirhsak turin ka Pa hnenah ngen thei loin mi ring em ni le? Nimahsela ngen ang ila, engtin nge Pathian Lehkha Thu- heti anga a lo awm tur thu hi-a thlen theih ang le?” a ti a,’ tiin(Matt.26:51-54). Chuvangin Isua ram chu hmuh theih lama innghat a ni lo tihna a nih chu. Isua chu a ramah a lo kal tawh a, hmuh theih loh ramaha lo kal ta zawka nih chu. Pathian ram chu hmuh theihin a lo thleng lo tih a sawi miau mai si a(Luka 17:20). Isua chu a mihrinna ni loin, a pathiannain, thlarauin a lo kal a, chuvang chuan a hmutute chuan,
            ‘Lalpa hminga lo kal chu a eng a thawl e,’(Sam 118:26)
tiin an lo sawi daih tawh a ni. Isua ngeiin, ‘Lalpa hminga lo kal chu a eng a thawl e, in tih hma loh chuan mi hmu leh tawh lo ang,’(Luka 13:35; Matt.23:39) a ti a. Tun lai Mizo Kristiante pawh hian Tum Kau Ni apiangin, ‘Hossana, Lalpa hminga lo kal chu a eng a thawl e,’ tiin an au rual thin tak a, mahse amah Isua lo kal leh chu an hmu chuang si lo ni awm tak a ni, a lo kal lehna an la nghak fan fan mai a nih hi. Amah (Isua) lo kal leh chu hmu si loin, ‘Lalpa hminga lo kal chu a eng a thawl e,’ an ti a; Paulate chuan Isua lo kal leh an hmuh avang zawkin, ‘Kan Lalpa chu a lo kal e,’ an ti a ni zawk si a.
Isua lo kal lehna hmuh dan inang lo-
            Isua chu a lo kal leh tawh thu kan sawi a, amah ringtute tana a lo kal leh dan leh amah ring ve lotute tana a lo kal leh dan a inang lo hle mai a, chuvang chuan tun lai Mizo Kristiante pawh hian ‘a lo la kal lo’ nia an ngaih tlat si chuan Isua zuitu Kristiante zingah an tel ve phak lo a ni mai lo ang maw le? A lo kal vawi khatnaah khan Palestina ramah a lo kal a, Israel beram bote hnenah chauh tirh a nihzia a sawi ang ngeiin Israel ramah chauh a lo kal ni awm tak a ni(Matt.15:24).  Chuvangin amah ringtute hnena a lo kal leh pawhin Israel ramah ngei a lo kal a, amah ring lotute hnena a lo kal leh pawhin Israel ramah tho a lo kal leh a ni tih Bible chang atangin a lang leh vek a ni.
            Isua’n a lo kal leh dawna thil  awm dan tur a sawi zawng zawngte chu a thlen kim hmain khatih hun laia mite kha chu an ral dawn loh thu chiang takin a sawi a, ‘Tih tak meuhin ka hrilh a che u, thil zawng zawng a thlen kim hma loh chuan tun lai chhuante hi an ral lo ang,’ tiin(Luka 21:32; Matt.24:34). ‘Lei leh van a ral ang a, ka thu erawh chu a ral lo ang,’ a ti a. Isuan, ‘Ka thu,’ a tih hi Mizo Kristian mi tam takin an hre thelh fo niin a lang a, Isua lo pian atanga a thiha a thawh leh, vana a lawn tur hrilh lawkna thu kha a ni a; kawng danga a sawi dan chuan, ‘Lei leh van hi a boral hma loh zawng dan thua mi chhun han te tak te emaw, thai han te tak te emaw pakhat mah a boral tawp lo ang, a zaa a thlen kim hma loh zawng,’ a ti. Ama chanchin tur an lo ziah lawk zawng zawng kha a sawina a ni. Isua lo kal lehna dan      hi chi hniha sawi theih a ni a, a chi khat zawk chu kan sawi tawh ang khan ‘amah ringtute leh a zuitu tak takte tana a lo kal lehna’ kha a ni a, chu chu a lo kal leh dan kan sawi zawh takte ang kha a ni. A chi khat dang leh chu ‘amah ring duh lotute tana a lo kal lehna’ kha a ni leh a, chu chu engti anga lo kal leh nge a nih i lo en leh teh ang.
Rapthlak taka a lo kal lehna-
            Heta a lo kal leh dan hi chu a lo kal leh dan kan sawi hmasakte nen kha chuan inang lo tak a ni. Hetah hi chuan phuba lakna a tel a, ‘Chung ni chu phuba lak ni a ni e, thu an ziak zawng zawng a lo thlen theihna turin,’(Luka 21:22) tih ziak kan hmu a, a rapthlak hle a ni. A lo kal hmasak tuma an khenbeh dawn lai khan Pilata chuan Isua chung thua mawh phurtu nih duh loin a kut a sil a, ‘He mi fel thisenah hian ka thiang e; nangnin in tih tihin ti rawh u,’(Matt.27:24) a ti a. Vantlang zawng zawng chuan, ‘A thisen chu keimahni chungah leh kan fate chungah awm rawh se,’ an ti a nih kha(Matt.27:25). A thisen mawh chu amah ring duh lo leh awih duh lotu Juda mipuite, ‘Khengbet rawh, khengbet rawh,’ tia au khumtute chungah ngei khan phuba a rawn la dawn tlat a ni. Tin, a thil mak tihtamna deuh deuh khua- Korazin te, Betsaida te leh Kapernaum khua te pawh kha he phuba lakna atana Pahtian hremna tuar nasa turte an ni a, heng khuate tuar tur ai chuan Tura leh Sidon khaw tuar tur te, Sodom leh Gomrra khaw tuar tur te chu a zia a awm zawk ang tih a sawi(Matt.11:21-24; Luka 10:13-15). Heng khuate hi Bible-a a lan dan chuan an sual em avanga Pathian hremna tawk bawk an ni a, meia kan raltir an ni. Chu phuba lakna rapthlak tak mai chu Isua lo kal lehnain a ken tel a ni tlat mai. He phuba laknaa Korazin khua te, Betsaida khua te leh Kapernaum khua te tuar tur chu Sodom leh Gomorra khua te leh Tura leh Sidon khua te tuar tur ai chuan a nasa fe dawn tih Isuan a sawi lawk sa a, Pathianin Isua tihhlumna leh zawlneiho an thahna thisen phuba lakna hmanrua atan Judai ram runtu hmelma sipai rualte hman a tum a, ‘Nimahsela sipaihote’n Jerusalem khua an hual in hmuh hunah, a boral dawn tih hria ang che u,’ tiin a sawi(Luka 21:20).
            Kum A.D.100 lai vel khan  phuba lakna chu a lo thleng ta a. Jerusalem kulh bangte chu chhut chhiat vekin a awm a, Judaho chu sala hralh darhin an awm a, an tuar nasa em em a ni. Isua sawi ang chuan heti ang khawpa hrehawm nasa hi khawvel awm tirh ata a la awm ngai lo a, awm pawh a awm leh tawh hek lo turin a sawi hial a ni(Matt.24:21). Isua sawi dan chuan, ‘Chung ni chuan raite leh nauno pawmte chung a pik ang, khawvelah hian hrehawm nasa tak a thlen dawn avang leh he chite(Judaho) chungah hian thinurna a thlen dawn avangin,’ a ti(Luka 21:23). Juda hnamte tan chuan an tuarna hi a rapthlak reng a, indona hi an awmnaah tawh chuan Judaho hi a tuar nasa ber ber an ni zel a ni. A hnu lam kum tam tak thlengin indona hrehawm an tuar a. Khawvel Indopui II-naah pawh khan Hitler-a sipaite chuan Juda mi 6,000,000 vel chu Concentration camp-ah dahin an ur hlum vek a ni. ‘Chung zawng zawng chu a thlen kim hmain tun lai chhuante hi an ral lo ang,’(Luka 21:32; Matt.24:34; Mark.13:30). a tih ang ngei khan Isua duh loa dodaltute hun lai chhuante kha ral hman loin kha phuba lakna rapthlak tak kha an tawng ta chiah mai a nih kha.
Lei leh van a ral-
            ‘Lei leh van hi a boral hma loh zawng dan thua mi chhun han te tak te emaw, thai han te tak te emaw pakhat mah a boral tawp lo ang, a zaa a thlen kim hma loh zawng,’ tih leh, ‘Lei leh van a ral ang a, ka thu erawh chu a ral lo ang,’ tih thu kan hmu bawk a(Mark.13:31; Matt.24:35; Mark.13:31; Luka 21:33).  Dan thua mi chhun han leh thai han te tak te pawh a boral hmain lei leh van a boral phawt dawn a nih chu. A nih leh Isua a lo la kal leh lo ni sela, lei leh van  chu a boral tawh em? Boral daih tawh e. Johana chuan lei leh van boral chu a lo hmu daih tawh nia! ‘Tin, van thar leh lei thar ka hmu a, van hmasa leh lei hmasa chu a boral tawh a, tuifinriat pawh a awm tawh lo a ni,’ tiin a lo ziak daih tawh(Thup.21:1). Johana chuan lei thar leh van thar chu khaw thianghlim Jerusalem thar angin a hmu a ni(Thup.21:2). Isua thihna kha ‘lei leh van boralna’ a nih chu. Isua lo kal lehna chuan thinurna leh phuba lakna a rawn thlen a, chu chuan khatih lai huna Judai ram khawvel(lei leh van) chu a tiboral ta bawk a ni

Jentail-te ni a kin-
            Isuan, ‘Jentail-te ni a kin hma loh zawng Jerusalemn hi Jentail-te rah behin a awm ang,’(Luka 21:24) tih thu a sawi bawk a. A nih loh leh Isua lo kal lehna chhinchhiahna pakhat chu Jentail-te ni kin hi a lo ni leh a. Isua chu a lo la kal lo ni ta se, Jentail-te ni chu a la kin lo tihna em ni ang? I lo en leh teh ang.
            A hmasa berah chuan Jentail-te ni a kin hma chuan Jerusalem khua chu Jentail-te’n an rap bet rih dawn tih kan hmu a. Isuan, ‘He in hi tichhia ula, ni thum chhungin ka tung ding leh ang,’ tih thu a sawi lai khan ama taksa  tihhluma a awm tur leh ni thum nia a thawh leh tur thu a sawina a ni tih Judate’n an hre lo a nih kha(Joh.2:19-22). Khati ang bawk khanIsua chuan ama taksa thu a sawina niin a lang leh tlat a ni. Chuti chuan a thiha a thawh leha vana a lawn hnu chuan Jentail-te rah beh phak a ni tawh lo a, Jentail-te ni chi a kin ta a ni.
            A dawt lehah chuan Israel hnamin zalenna famkim (Independent) ni 14 May, 1947-a a hmuh khan  Jerusaelm chu a pumin an la nei thei lo a, Ni ruk indona kum 1967-a an neih khan an hmelmate lak atangin Jerusalem chu a pumin an chang ta a, Jentail-te ni chu a kin ta a ni tih a chiang leh a ni.
Khawvel tawpna-
            Isua lo kalna leh khawvel tawpna hi a inzawm bawk a.  Isua’n khawvel tawp a sawi hi Judai ram khawvel tawpna a ni. A zirtirte’n, ‘I lo kal lehna leh khawvel tawpna chhinchhiahna chu eng nge ni ang, min hrilh rawh,’(Matt.24:3) tia an zawh kha Judai rama phuba lakna rapthlak tak lo thlen hmaa thil lo awm turte a hrilh a nih kha. Kha phuba lakna avanga Israel rama Jerusalem chhiat buaihna leh mihring thihna leh tuarna nasa tak kha khawvel tawpna chu a ni. Kha chhiatna leh phuba lakna(khawvel tawpna) kha Isua lo kal lehna avanga thil lo awm, Isua lo kal lehna nena thil inkaihhnawih a ni a, Isua lo kal leh hnua lo thleng a ni. Isua’n, ‘Tin, he ram chanchin tha hi hnam zawng zawng hriattir turin khawvel zawng zawngah hrilhina awm ang, chu mi zawhah chuan tawpna chu a lo thleng ang,’ a ti a(Matt.24:14). Kha chhiatna kha a lo thlen hma khan Isua chu a lo kal leh a, a lo kal lehnain a ken tel a ni tih hria ila. Vana a lawn dawn khan, ‘Khawvel zawng zawngah kal ula, thil siam zawng zawng hnenah chanchin tha hi hril rawh u,’ tiin a chah a. Amah Isua lo kal leh hnu khan Israel ram chu an fang ta a, Isua chanchin thu chu an hril ta a nih kha. Amaherawh chu Mizo Kristiante’n ‘khawvel tawpna’ kha kan chenna lei(earth) pumpui sawina emaw an ti zel a, a ni lo. Isua chu a lo kal daih tawh a, khawvel pawh a tawp tawh. Tuna Israel ram khawvel khu chu an khawvel tawp tawh hnua an khawvel thar a nih khu.

Tlipna-

            Isua chu a pathiannaina lo kal leh, thlarauin a lo kal leh kan ti a. A nih loh leh awih lo kan la awm hram em ni? Isua chu a lo la kal leh rih lo, kan la ti talh dawn em ni? Amah ngeiin, ‘Mihring Fapa a lo kal hmain Israel khuate chu in fang chhuak lo ang,’ tih thu a sawi tlat si a(Matt.10:23; Tirhkohte 1:4). ‘Mihring Fapa’ hi Isua ni lo mi dangah kan puh daih a nih si loh chuan, ‘Tih tak meuhin ka ti a che u, heta dingho a thente hi, Mihring Fapa(Isua) a rama lo kal an hmuh hma loh chuan, thihna tem tawp lo tur an awm...,’(Matt.16:28) tih thu kan hmu si a, a lo kal hmaa thihna tem lo tur kha Johana chu a tel ngei a, Johana kha a la dam em le? Isua lo kal lehna leh Pathian ram lo thlenna hi thuhmun renginIsuan a sawi tlat mai. ‘Tih tak meuhin ka ti a che u, heta dingho a thente hi, Pathian ram thiltihtheihna nena lo thleng an hmuh hma loh chuan thihna tem tawp lo tur an awm...”(Mark.9:10). ‘Dik takin ka hrilh a che u, heta dingho a thente hi, Pathian ram an hmuh hma loh chuan thihna tem tawp lo tur an awm...’(Luka 9:27). Isua’n Petera hnenah a zirtirpui Johana chu, ‘Ka lo kal leh thlenga awm rengah phei duh ila....’(Joh.21:22) a tih khan a zirtir dangte khan Johana kha a thih ve loh tur thu a sawi emaw an ti a, mahse a thi dawn lo tih thu a sawina a ni lo a, a lo kal leh hun thlenga dam tura a sawina a ni zawk si a(Joh.21:23). Chu Johana ngei mai chu savun uiha an tuam kha a ni a, a thi daih tawh bawk si a, chu chuan Isua chu a lo kal leh tawh ngei a ni tih a ti chiang hle awm e.  

3 comments:

  1. Lal Isua hi a mawi ber e.. Hling lukhum in phuar vel mahse

    ReplyDelete
  2. Pathian rorel na ah hian mihring te ngaihdan a la lo tih hi hria ila, i thil sawi reng2 hi uluk tak in Pathian thlarau Thianghlim awmpui na leh kaihhruai na dil tel in i zir nawn leh dawn nia

    ReplyDelete