ZO PUM CHHUAK

Mizote hi kan pipute chanchin kan sawi nikhua hianmi lu la hnam, thingbul lungbul bia kan ti leh mai ṭhin^. a. Hei hi chu kan chanchin chhui tute chhui dan a ni hauh lo mai. Hnam dangin min bel chawp a ni. A hnama hmer dawn chuan mi lu la hnam chu tumah an awm kher awm lo e.

Hmanlai chuan doral leh sakawlh awm a tam a, mipa puitling chin tan chuan chung ho laka khua leh tui venhim chu an hna ber pakhat a ni. Sapuiin ran a seh a, a thawm hre phaka an awm phawt chuan chhuhsak leh ngei an tum a, a hre hmasa sa an tlan vat ṭhin. Sa hliam an chhui pawhin a kal hmasaah ṭan an tum tlat a, a kal hmasate chuan mipuiin an rawn chim ang tih an hlau a, an hnuhma te an lo thup ṭhin. Chuti ang bawkin an ral lakah an khua leh tuite venhim chu mipa hna a ni a. Ral an beih a, hnehtu an nihin an ral thahte chu an ai ṭhin. A pawng atakin mi lu an la ngawt ngai lo. Sawrkar leh sawrkar an indoin mi tamtak an tihlum ṭhin, mahse 'tualthat' an ti ngai lo. Tunhma chuan keini Mizote chu khaw hran a nih tawh a, an fate in dang an nih ngawt loh chuan an lalte azirin ral an ni deuh mai zel a, an doralte chu hnehtu nih an tum tlat ṭhin. An dinhmun a ralmuang lo em em a ni.

        

Mipa puitling tawh phawt chu zawlbukah an riak khawm a, val upain an ho ṭhin a, aia upa thu an awih lo ngai lo. Misual, awm tha duh lo pawh an awm lo der bik chuang lo a, mahsela, chutiang misual fal bik an awm chuan zawlbukah an din hual a, an nam vaka lehlam aṭangin an rawn nam leh a, an nam tawn chhen ṭhin. Chutianga an inhremna chu, 'Awlrawt,’ an vuah a, chuti anga hrem ngai nih chu a zahthlak em em ṭhin a ni.

Zualko kal tur  emaw awm se, a hre hmasa apiang an tlan nghal ṭhin a, an khaw kar kawngte chu ngaw dur pui pui, sa hlauhawm te awmna a ni nachungin tlangau emaw, zualko kalna tur hria chuan an ṭhiante an sawm kual hmasa ngai lo, mahni remchan dan ang angin an kal nghal mai ṭhin a ni. Zanah pawh ni se an eng neih ṭhat ber mau phel sin, meichher chhiin an kal mai ṭhin a ni. A tlawmngai zual phei chu zawlbukah pawh a lai lumah mu loin, a tul huna tlan chhuah mai awlsam nan kawngka bulah an mu mai ṭhin a ni.

An eizawnna lam, an thlawhhmaah pawh a vau fem lam chu sa leh ral lakah a hlauhawm ṭhin a. Chuvangin, pasalṭhate chuan, "Keiin lo hla ber ka nei ang a, Lalin a hnai ber a nei ang a, hmeithai leh pachhia ten a lailum nei rawh se," an ti a, khaw chhungah pawh Pasalthate chuan, "Kei veng hmawrah ka awm ang a, Lal leh hmeithai leh mi chhumchhiate veng lailum lamah awm rawh se," an ti ṭhin. Chhiat ni ṭhat ni, zawlbuk leh puipun nikhuaah val upa in ro an rel ṭhin a, khawtlang in awpna leh thubuai hla buaiah Lal leh a upa ten ro an rel ṭhin a, an thu rel ang angte chu tumahin an zawm lo ngai lo. Chhiat ni ṭhat ni ah an inṭawiawm ṭhin a, hmanlaiin mihuaisen pakhat Darhnawnga a awm a, a nupui hnenah, "Nu-i, puan danglam bik min tahsak la, chu chu ka veng ang a, ka neih chhung chu sa leh ral lakah ka tawlh ngai lo ang," a ti a. A nupui chuan puan chu a tahsak ta a, chu puan chu, 'Tawlhloh puan,' an ti ta a ni. Tun thleng hian kan hnam puan mawi tak a ni reng a nih hi.

Kan chanchin chhe lai awm mah se, kan sawi lan tur leh kan tana ṭangkai tur chu tawlhloh puan nei hnam, ṭhian chhan thih ngam, chhiat ni ṭhat ni a mite ṭanpui ṭhin hnam, tlawmngai leh aia upa, val upa leh lalte thu hnial ngai lo hnam kan ni tih hi a ni. Chu mai ani lo a, a bikin thlan laih leh mlizawn phei chu nuam an ti zawk emawni chu tih mai turin an tlawmngaihna chu an lantir ṭhin a, hnam dang phei chuan, "Mizo chuan thlan laih an chak," te min tih phah hial reng a ni. Chu ngei chu a ni Zo pum chhuak, Mizo hnam chu.

Hun a lo kal zel a, kan zualko kal ṭhin kha lirthein kan kal a, hun a lo kal leh hret a, lirthei pawh chu phone-in a rawn thlak leh ta a, kan beng kan hup a, khawi hmuna mi pawh bula mite ang maiin chanchin a chhia a ṭha kan inhrilh ta zung zung mai, kan va han hahdam sawt ta em! Hmun ṭhenkhatah phei chuan thlan laih leh khawhar in riah te a lo tawp leh ta bawk nen. , Hmanlai ṭul tamtak kha tun huna ṭul lo a awm tawh a, hmana ṭul lo tuna ṭul ta te pawh a awm ang. Chutihrual erawh chuan kan Zo pum chhuak hmanraw ṭhate kha a bo pil zo ta mai em ni? A chhertuin kan zir lo nge, a hmangtuin kan hmang peih ta lo em ni zawk? Tlawmngaihna te, ṭhian chhan thih ngam mi huaisen nihna te chu kan la lam ri ve reng a, 'Mizo kan ni, kan hmel a ṭha; chutin kan hming than mawina chuan khuavel a deng chhuak ang’ tih hla te chu kan paih phal si lo.

Tunah chuan sa leh ral kan do tawh lo, kan do leh kan buante chu ruihhlo leh hlemhletna te a ni ta ber mai. Kan pi leh pu ten sa leh ral laka an nun an thap ang khan ruihhlo leh hlemhletna do tur hian puan ven i sawi chhing ang ule. Sakhaw hruaitute pawhin Pulpit leh lenkhawmnaah chauh do loin ni tin hnatlawhna ah te do ta zawk ila; Contractorin a hna thawhnaah do se, chhiat ni ṭhat ni a kan chet dan tur hi chhung inkhawmnaah sawi tam bawk ila, chu chuan kan tlakbalna tamtak hi a chhawmdawl ang a, thlan lai tura au rinnaa in auh nawn ngaite hi i thai bo leh thuai ang u.

Hmanah chuan sa leh ral kan do a, tunah chuan ruihhlo te, hlemletna te, thatchhiatna te, hnam dang nun midang ngaih pawimawh lohna, 'Its my life,' ti a, mahni chauh inngaih-tuahna, arṭial fin kan tih ṭhin te chu kan do an lo ni ta. Hmanah chuan lal leh upa leh val upa ten khawtlang leh ram an enkawl a, tunah erawh chuan soawrkar leh YMA te'n an enkawl a, kohhran pawhin thu an nei lian hle. Chuti chung chuan a ṭha lama hmasawn a har hle mai. Hmanah chuan khawtlang leh ram venhim nan an nun an thap a, tunah hian hlemhletna leh ruihhlo do kawngah te, chhiat ni ṭhat niah te hian eng nge kan an ve le?

Zo nun mawi, Zo pum chhuak ngei kha dinpui a, vawng nung zel turin ṭhalaite hi kan tlawm mai dawn em ni le?

Infiamna leh zirna lamah te rual pawl tawkah kan inngai a, amaherawh­chu, ruihhlo leh hlemhletna do kawngah te, nangmah i inhmangaih angin i vengte hmangaih rawh, tih thuthlung vawng nung turte hian a bikin chhiat ni bika kan inṭawiawm danah hian Zo puma kan intuaithar a ngai ta hle niin a lang.