RORELLIANA’N VANRAM A KAI DÂWN LO

             Rorelliana’n vanram a kai dâwn lo,

            Isua’n vanram a kai dâwn lo,

            Rama’n vanram a kai dâwn lo,

            Budha’n vanram a kai dâwn lo,

            Mohammeda’n vanram a kai dâwn lo.

            Khawvel mihring zingah vanram kai tur pakhatmah an awm lo.

     Vanram chu Pathian, Chung Khuanu chenna khawpui, Pialral chu a ni a, chu chu van khawpui, Pialral aṭanga piangte chauh chenna tura siam a ni.

     He leilunga piang tisa mihring reng reng hi van-pialralah thawn chhoh tur pakhatmah an awmlo, thawn chhoh theih a ni hek lo.

Mihring Isua kha vanram kai theih a ni lo a,

Mihring Rama kha vanram kai theih a ni lo a,

Mihring Muhammeda kha vanram kai theih a ni lo a,

Mihring Rorelliana kha vanram kai theih ani hek lo.

     Mihring kan nih ṭheuh lai pawha Pathian, Khuanu aṭanga kan dawn Nunna thlarau, van khawpui, Pialral aṭanga lo chhuak Pathian, Khuanu nunna kan chan vanram kai tur leh Pialral changtu chu a ni. Kan mihring tisa reng reng hi chu he khawvel tana chauha Pathian ruat a ni a, vanrama vawrh kai tur pakhatmah a awm lo. Hmeichhe chhul aṭanga lo chhuak zingah leilung pian tirh aṭanga vawiin leh hun lo la awm zel turah pawh Pathian pakhatmah an awm lo a, an awm dawn bawk hek lo a ni.

     Pathian chu pakhat chauh a ni a, engkim siamtu chu a ni.  Amah lo Pathian dang ni a sawi reng reng kan be tur a ni lo. Amah chu tisa mita hmuh theih a ni hek lo.

     Pathianin a aia ding tura a ruat he khawvela awmte reng reng hi an hlu em em vek a, Pathian anga biak mai tur erawh an ni lo.

     He hringnun tisa, leilung lama lo piang chhuakin Pathian aṭanga chhuak chatuan nunna an kawl(nei) ta mai hi a va ropui teh lul em..!!

     Chhung nung lamah chatuan nunna famkim kan changa, a changtu hring lam tisa hi Chhung lam rorela a luh hnu chuan leilung hmuh theih Pathianah a lo chang ta a, Pathian, Khuanu zia a hman chuan khawvel tan belh tlakin a lang chhuak a, Chhung nung Pathian, Khuanu zia hmang lo a, ama mihrinna zia a hman chuan leilung thil tinreng tan mi hnawksak angin a lang chhuak thung.

     Vanram lam aṭanga chhuakin van Pialral a chang ang a, leilung lam aṭanga chhuakin leilung hi a ro chung bawk ang.

            Hring lam tisa tan khawvel hi kan khualzinna ram a ni reng reng lo. Kan tisa chatuan ram a ni a, kan thih hnu pawhin kan ruang chuan leilung a luah zui zel ang a, leilung tan a hlutna a la chhuak zel dawn a ni. Pathian, Khuanu aṭanga chhuak kan van taksa, kan Pathianna ngei kha vanram, Pialral kai tur chu a ni.

Rorelliana

Phone No: 9612207107