NUNNA

-         ‘Nunna’ hi eng nge ni le? Engtin nge kan sawi fiah ang le? ‘Nunna’ han tih hian pakhatah chuan he kan taksa tichetu, kan vêla thil awmte kan hmuh a, kan khawih a, a nihphung kan hriat theihna tûra min tinungtu, kawng hrang hranga kan inenkawl theihna tûra hriatna leh thiltihtheihna min petu hi ‘nunna’ chu a ni kan ti thei âwm e. He nunna kan sawi hi, ‘tîsa nunna,’ kan tih ṭhin hi a ni. Tichuan, hê nunna kan sawi hi lan hun chhung nei, tâwp chin nei tura duan a ni a, lang theia mihring pianpui, mihring nihna lang chhuak thei nunna a ni a, nasa taka mihring vékin a thunun theih leh kaihhruai theih a ni. He nunna chet vel theih hun chhung hi mihring dam chhung kan tih ṭhin hi a, mihring nih ruala lo awm leh mihring dam chhung hun daih tura buatsaih, mihring pianpui leh thihpui tura buatsaih a ni. 

             A dang lehah chuan he nunna kan sawi piahah hian mihring aṭanga chhuak ni lo, mihring awm hma pawh lo awm tawh, mihring kan nih rual ruala mihringin a neih nghâl ni si, mihring tisa tawp hun pawha tawp ve tawh lo, chatuana nung, mihring tisa nunnain a thunun leh tihdanglam phâk ni tawh lo, mihring thununtu leh tidanglam theitu ni si nunna a awm leh a. Chu chu, ‘Chatuan nunna,’ kan tih ṭhin hi a ni a, ‘Chatuan Thlarau,’ ti pawhin a sawi theih ang chu. Chu nunna chu Pathian aṭanga chhuak a nih avangin Pathian nunna/Pathian thlarau a ni a, a danglam ve ngai lo a, bul ṭan ni pawh a nei lo a, tâwp hun tur pawh nei lo tur, chatuana awm leh nung reng, mihring tifamkimtu, mihring nun tithlamuangtu, mihring nun chhungril thununtu bulpui ber chu a ni. 

            Mihring tîsa nunna in a thunun leh a khawih danglam phâk a ni lo a, a tihchhiat theih pawh a ni lo a ni. Hengte chauh hi mihringin nunna a neih leh a neih theih chu a ni a, mihring hian keimahni aṭanga chhuak emaw, keimahni siam chhuah chawp emaw chatuana awm tur leh chatuana awm thei thlarau emaw, nunna dang emaw kan pian chhuahpui loa, kan siam ve thei lo a ni. Mihringin chatuana nung tur thlarau a neih chhun chu Pathian thlarau, Chatuan nunna chauh hi a ni. Tichuan, heng nunna chi hnih, ‘Tisa nunna’ leh ‘Chatuan nunna,’ te lo chhuahna leh a bulpui, a dintu leh a neitu, a kawltu chu Khua Pathian a ni.

                                                                                                                                    Lalramhluna