Mizoten Kristian zirtirna kan dawn chu kum za chuang a ni ta.
Chuti lai karah chuan harhna chi hrang hrang leh hriatna chi dang dang chuan
min tuam vel a. Kristian zirtirna kan hmuh tirh phat atangin ngaihdan in ang lo
leh aw-phawi in ang lo a lo piang nghal a. Baptish Kohhran leh Presbyterian
Kohhran chuan chhim leh hmar ramri a kham nghal a.
A lo rei deuh hleka Baptisma uar zawka thurina nei te,
chhinchiahma dang aia puanzâr rawn chelek tute nen, Rom Kohhran te a lo ding
zel a, Judaism te, Mizo Juda te, Chhinlung Juda te, sunday serh leh Sabath serh
te, thawhtan serhte thlengin Kristian kan ni rei tual tuala, ngaihdan hrang a
tam tual tual a, Setana pawl thlengin a lo piang ta a ni. Chung zawng zawng
chuan Bible ami an changthlan vek a, Bible-ah pawh thuthlung thar bu duh miah
lo te, Isua duh miah lo te, Isua chauh ti tûk mai te, Bible ring si, tawngtai
duh lem lo te, heng zawng zawng hi mahni hnam thil Pathian thu ni loa ngai a,
mi hnam tih dan zir an ni tlangpui. A thente chu sa engkim ei thei, a thente
chu ei theihloh nei burte an ni a. Chu pawh chu Bible chhung bung leh chang
tlawhchhan nei vek an ni.
Mizoram zîm têah hian rin dan chi hrang hrang za aia tam an awm
ta mai. Thurin bu khat intawm siah chuan ngaihdan hrang tamna ber a ni hial awm
e. Ngaihdan in ang lo satliah mai pawh ni lo Vanram kai ho pawh an tum lo hial
a ni. Lungrualna chi khat an neih chu mahni hnam zia thil tling lo a dah a, mi
hnam tihdan tling zawka ngaihna hi an lungrualna awm chhun a ni awm e. Tawngtai
hi an uar hlawm viau a, Pathian an dah dan leh an tawngtai tawpa Isua hming an
lantir dan a hrang nuaih mai a. Bible an zir dan a in ang lo a, zir chhuakte
pawh Pastor atan an zirna hmun a zirin rawih duh leh duh lo an nei.Chuti ang
khawp chuan Zofate then darhna thuthlung chuan min chîm buai ta a ni. A that
loh zia han sawi hlek ila, ‘ziak leh chhiar min thiam tir, min ti changkang a,
khawvel êng min hmuhtirtu,’ tiin an tan leh lawi si a. Chu zirtirna hnuaiah
chuan kum za aia tam kan khawsa ta. Min tichangkang kan tih rualin min tih
changkan dan hi awpbeh nuam tawkin min ti changkang a, Khuanu min pek kan nun
thate min tun dinpui aiin mi lu la hnam, thingbul, lungbul biaah kan inzir chhuak
phak tàwk a, kan hnam zia a sakhaw kalpui an awm chuan kan hmu ramhuai hû zel
mai bawk si. Juda ho chu an tâm avangin buh tamna ram Aigupta lamah an pem a,
pem lut na na na chu a ram neitute bawihah an awm lo theilo a, kum 40 zet
Aigupta bawihah an awm reng a ni.
Keini erawh chu Khuanu min pek ramah hiam mâimi zial ang maiin
hnam dang zirtirna chuam min ti tawngvai ta nuaih nuaih mai a nih hi. Engemaw
chen chu min tichangkang ngei mai. Amaherawhchu, thawnthu diklo inhrilh ang
deuh a nia. Thawnthu tha lo tak pawh hi inhrilh ila hriatna chu a tizau a,
mahse kan tan a tha lem chuanglo a ni.
Tunah chuan kan sakhaw dikah Khuanuin min kai harh leh tan ta.
He hun thleng tur hian kan vanglai hun tha zawng zawng chu kan hmang liam hman
ti tih a. Chutah, hnama min dintu chuan tum a nei a, kohhrana tui taka rawng
kan bawl lai chu thurin kalh leh tihsual nei chuanglo mah ila hnawk min ti tial
tial a, min um chep zel a, kohhran lianahte kan hnawmg tan a, kohhran tê
deuhahte kan ti chho zel a.Chutah Mizo Evangelical Association(MEA) a lo ding
a, a hnu kum 6 lekah MEA chu mipui nawlpui huapzo Lalchhungkua-ah a lut fel
chiah tihin pawlah harsatna a lo thleng leh ta a. Chu harsatna chuan Nunna
Lalchhungkua a rawn piantir ta a. Nunna Lalchhungkuaah pawh chuan a lang a paua
hnam zia leh hnam Sakhua puan chhuahna kan la nei mai lo, kan la ti deuh duar
a. Chutah kum 1990 a lo her chhuah meuh chuan Champhai inkhawmpuiah kan nihna
diktak chu puan chhuaha a awm rualin kan hnam tà ni lo, min tuamtu Kristian a
tlâwm thu chu thu leh hla leh hnam thuam famkim nen puan chhuah a lo ni ta…!
Hei hi thil namai a ni lo, kan hnam thilte miin
hnawmhne maia an ngaih tawh hnu leh kan hnampuite inkhawmpui; Western suit nen,
a nalh thei ang bera fashion show ang maia an nalhna karah, puan vengin,
pheikhawk pawh bun loin Champhai khawpui chu kan tuam ta a. Mahni pawh tim uai
uai chungin kan hmaa tihtur awm chu kan han tâwn tlang ta a nih kha. Mite
chuan, "Chhei raw! mual zu an hûng leh ngei dawn e," an lo ti râwl
vei nen. Mahse mual zu hun hlau em em tute hian eng zu zu emaw an hûng thung si
a nih hi. Kan thalai, 'Ram Kalsiam' rualte chu hmuntinah hmam lâm nen an
fehchhuak a, kan Mizo puite ngei chuan mak thlirin min thlir a, kan hnam lâm
chu,'Lalchhungkaw lâm,' an ti! A va han bo theih ngai em!
Chu
mai a la ni lo, kan fate'n nitin sikulah harsatna namên lo an tawh tâk avangin,
chu harsatna chuan Lalhnam Sikul a dintir ta nawlh mai bawk a ni. Chhiatni
thatni a ensan tura invauna tinrèng leh nupui pasal thu a harsatna te,
kawrchung dum hual vêl kara inrikrâpna, chanchinbu leh pulpit tlangah te,
khawlai titiah te, Ar chu tui lo ang maiin min chhuah a, mak thlirin ram mipui
hian min thlir thin a nih kha.
Chuti
anga kawng kual leh bumboh chu kan zawh hnuin tunah chuan kan hnam ziain kan
ramah thiam a chang tan ta. Kum 25 chhung zet kan hnam zia thiam chantir tura
lehkha kan tlanpui hnuin tunah chuan World Record meuh siamin kan hnam zia chu
khawvelah a inpho chhuak ta. Hei hi Lal thu a ni ber lo kan ti a nih pawhin Lal
thu hmute inlan chhuahna chu a ni ngei mai. Juda leh thlang sapin min bawih dan
pawh hi, 'Pathian thu' ti a an sawi lai rengin kan hriat loh hlanin an hnam
ziaah kan lo lut daih mai a nih hi. Tunah chu bawih ata chu kan chhuak ta.
Chapona, lal hrawtna leh mi hnuaichhiahna tello thangchhuahna chu kum 25 lai a
lo tling ta mai hi a kawng chu kualin bumboh hle mah se, engmahin a dal thei
lo, Chung Khuanu hi a va ropui em!
tren tren...
ReplyDeletesual
Delete