Editor Picks


widgeo.net

Thursday, October 20, 2016

BUMIN AWM SUH

"Bumna thu, inbumna a ni tih hretu chu miffing
tihnghin rual loh chu a ni."

"Bumna thu leh thutak hre hrang thiam lo hnam chu mi
rah beh leh mi thuhnuaia awm kumkhua tur,
hnam â chu a ni."

SETANA A AWM LO
Kan hmuh theih zawng zawng leh hmuh theih loh thil awm zawng zawng hi Pathian Siam leh a kutchhuak vek a ni.
Thilnung tinreng leh an nihphung leh zia tûr zawng zawng nêna rêl fel vektu, mihring awm dan tûr leh nunphungte hmaih hauh loa rêl feltu Chung Khuanu hian leilung pian tirh aṭangin rel sual leh rel hmaih pakhat mah a nei lo a, a ruahman lawk eng mah a tidanglam ngai hek lo.
A duh duh awmtîr a, a duh duh dah bo zêl theitu hian Amah do theitu tûr leh Amah bei tawk deuh thial Setana a lo siam tel palh hlauh a nih chuan a siamtu chu a ve tak, a tâna pawi tûr pawh duang tel ve, engkima rin tlak vak loh a ni ngei ang.

Kan Pathian, Chung Khuanu kan sawi hi chu tisa mitin hmu hauh lo mah ila, a thiltihtheihnain a rawn inpuang zel a, lang lâwk lo leh hmuh lâwk hauh loh pawhin a thiltihtheihna hmangin a inpuang zêl a, "Pathian aw ka hre ve lo, A thiltihtheihna ka hmuh pawh ka hre ve lo," titu tân pawh khawvêla thilnung awm zawng zawngte leh thilsiam kan hmuh theih zawng zawngte hi Pathian inpuanna vek an ni a, Pathian, Chung Khuanu hi hai theih rual a ni lo.

Mi zawng zawng tân nat theihna a dah sa a, dam theihna pawh a dah sa a, kan nat pawhin, kan dam pawhin Pathian remruat loh a awm chuang lo. A thiltihtheihna pho lanna tûr chuan damlo pawh chawp­lehchilhin a damtîr nghal mai a ni.
Pathian, Chung Khuanu hian hmuh loh leh hriat loh lam aanga hna a rawn thawh hin ang hian mihring thlêm thei, sual lama min hruai thei, vak vel ruai ruai, mi ha pawh sual lama thlem thlu thei, tisa mita hmuh theih si loh, Setana awm anga inzirtirna hi inbumna dik tak chu a ni.
Mihringah hian hat theihna leh sual theihna a awm sa reng a, mi tuin emaw, "Ruk i ru ang hmiang," ti sela, "Aw" tih leh "Aih" tih theihna kha amahah khan a awm sa reng a, mi hmuh ve miah lohah lâk rûk tûr awm rengna hmunah pawh, "Ka la lo ang" tih theihna leh "Ka la ru ang" tih theihna pawh amahah khan a awm sa reng a, a rilru a dahna lam lam kha a ni mai.
“Setana'n min thlem a, kan hneh lo a ni," tih hi mahni inhumhimna tura amah thlemtu Setana a siam chawp mai mai a ni. Setana hran a awm reng reng lo, amah leh amah vek a ni zawk.
“Ka hmelma, ka hringnun ngaihtuahna,
Lal Pathian remruat pawh zah lotu;
I chhuahna lei ramah kir turin liam mai teh,
thlen phak !oh Lal ram ka neih hi."
rual awta min tlântîrtu ka hringnun ngei hi ka hmelma lian ber chu a ni.
Mihringa Pathian remruat lo lang, lo dodal hintu chu mihringa awm sa reng, mihringa a duh thlana dik lo kha a ni mai a, “Setana'n min thlem thlu," tih kawi a ngai reng reng lo.
Min siamtu kan Pathian hian dik tlat theihna a dah sa thlap mai a, chumi vawng nung rengtu chu dik lohnain a hneh thei ngai lo ang.
Hman lai kan pipute, Zo nunah khan (an sawi Isua leh thlemtu Setana an tih kha an hre ve reng reng lo) ram, hnam, khawtlang leh chhungkua hriatnaah an inchhungkhat tlat mai a, ram, hnam, khawtlang leh chhungkuaah rinawmna, dikna leh tlawmngaihnain hnam a tlan tluk tluk mai a ni.
ZO HNAM KRISTIAN NIH HMA A PATHIAN THU CHU
henawm khawveng tana mi dik leh rinawm nih te, mii rethei leh harsa ṭanpui te, buh seng laia vaua buh ṭek tla, vui ha tak tak pawh ni se nungchate tâna zuahsak a, lâk ngai loh te, buh chhêk laia buhzêma mi, buh nei ve lote ruh ve tûr, hnuchhiah zat zat te (an rût fai vek ngai lo), ṭhian tâna rinawm taka din tlat te, thih a ṭûl pawha ṭhian chhanna tûra thih ngamna nun te, mahni thil neih mahni chhungkua chauha ei bil duh lo a, thenawm khawvêngte sem ve zat zat nun te, pipu aṭanga khawtlâng kalphunga thiang leh thiang lo an neihte zah taka pal chhe mai mai loa zawm thlap thlap te, aia upa leh nu leh pa zahnate chu kan Zo hnam Pathian thu vawn nun tlat chu a ni ṭhîn.
ZO HNAM KRISTIAN NIH HNUA PATHIAN THU VE THUNG CHU
Isua rin chu vanram kaina, rin loh chu hremhmun kalna, mi tin thinlunga Isua laltir ber, Isua chanchin khawvêla hrilh darh, Isua hminga ṭawngṭai, Isua hming fak, Isua tâna thilpêk pêk te.
“A nu leh pa leh a unaute keimah aia hmangaih zawk chu ka ram mi ni tlâk an ni lo," Isua'n a ti. Tin, "Khawvêl hi hmangaih suh ula, a chhunga thil awmte pawh hi hmangaih hek suh u, miin khawvel a hmangaih chuan Pa a hmangaihna amahah a awm lo,” tihte a ni.
Kristian zirtîrnain Zo hnam a luan chhuah zawh meuh chuan Isua pianna Israel ram leh hnam, an khua leh tui, lui leh tlâng zawng zawngte nên Zofate Pathian fakna hla ropuiah an lo chang zo ta!
Zoram leh Zo hnam chu Zofate nunah chuan khawvêl thil, Pathian thu ni loah a chang zo ta! Zoram leh Zo hnam chuan khawngaihtu leh hmangaihtu a nei ta lo a ni.
Pathian thua ril inti apiang chuan Zoram leh hnam chu an tlansan chiang ting mai a ni! Israel ram sawi ril thei leh Bible chhung thu sawi ril thei leh sawi thiam thiam kha Zofate Pathian thu thiam an lo ni zo ta.
Kan Zoram chu Kristian ṭha ram, Chanchin ṭha puang darh tûra Pathian bel ruat, mahni ram leh hnama rinawmna leh dikna nei chuang reng reng lo hnam kan lo ni zo ta!
Zorama sualna a san zawh poh leh, "Bible thu hi a thleng dik mang e, 'Sualna tihpun a ni ang,' a tih avangin, sualna a pung ta a ni," an ti zel mai a, kum sang tel pawh Kristian ila kan ram chuan a thatpui dawn Chuang lo niin a lang.
Kan ram sualnaa min hruai luttu hi Setana a nih chuan Zofate Setana Chu Kristianna hi a ni ngei ang le.
Ram leh hnam hmangaih thei loa min siamtu, nu leh pa, unaute hmangaih thei loa min siamtu Kristianna hi kan hnam hmelma lian ber chu a ni.
Kan Zoram leilung, thing leh mau, lui leh tlangte leh a hnam neitu Zofate hi Kristian Pathian thu Bible-ah ziah lan ve pakhat mah a awm loh avângin Bible ziak Pathian thua nei tlattu Kristiante chuan kan ram leh hnam hi Pathian thua an ngaih tlat loh avangin Pathian thu aṭangin an hmangaih thei lo a, ram leh hnam tâna dikna leh rinawmna neih an tum reng reng lo a ni. Isua hmangaih a, a tâna nung tûra inzirtirna chuan an inchhung khat tlat mai a, “Lal Isua chu kan engkima engkim a ni," an ti ringawt mai a ni.
Kan ram leh kan hnam leh min siamtu kan Pathian inkawp tlatah hian Zotate Pathian thu chu a awm famkim vek si a. Israel ram leh hnam leh Mari fapa Isua Pathian thua min rawn neihtîrtute hian min rawn bum a ni tih hi Zofa hian i hre mawlh teh ang u.
Min siamtu kan Pathian hian kan pi leh pute hmangin he Zoramah hian min hruai lût a, Zofate tâna Khuanu ram min pêk chu Zoram hi a ni. Chinese-ho min pêk a ni lo a, Burmese-ho min pêk a ni lo a, Indian-ho min pêk a ni hek lo.
Zo hnam tawh phawt chu khawi ramah pawh piang mah se, Zoram hi an ram a ni a, nang phei chu Zoramah i piang a, Zo ram buh leh bal, thlai chi tinreng leh a boruak thianghlim leh tuite ringin i nung a, i ram leh hnam hi i Pathian thu dik tak chu a ni.
Pathian thu kan sawi i tih reng rengin engati nge i ram leh hnam i changthlan ngai reng reng loh? Mi ram leh hnam Pathian thuah i nei tih i inhre thei em?
Bum i ni a, a bumtu che kha thlemtu Setana a nih chuan mi ram leh hnam Pathian thua min rawn neihtirtu Sap missionary-te kha Zo hnam bumtu Setana an ni ngei ang.
Evi leh Adama bawhchhhiatna avangin mi zawng zawng mi sual kan ni tih min rawn zirtîrte hi dâwt, inbumna dik tak a ni. Evi leh Adama thlahah hian Zofate hi leilung pian tirh aṭang khân kan la tel rêng rêng lo a ni. Min thlahtu ni lo, hnam dang bawhchhiatna leh sualna kha kan hnamah pakaitîr dân a awm lo. Sanghar Ar lâk chîn Zawhtein a phurh ve ring duh suh, a âtthlâk lutuk.
Evi leh Adama bawhchhiatnain a chim buai phak loh Zo hnam kan ni a, tlan ngai kan ni lo a, chhandam ngai kan ni hek lo. Chung Khuanuin a duh ang thlapa a siam, tisa nunna leh thlarau lam nunna famkima a thuam sa thlap, tisa thihna a lo thlen hnu pawha Chatuana nunna, Van taksa famkima Pathiana awm sa, danglam ngai lo Zo hnamte kan ni ngai e.
Mahni ram leh hnam ṭhatna tûra thawktu chu Pathian tâna thawktu chu a ni a, mahni ram leh hnam pawi khawihtu chu Pathian pawi khawihtu chu a ni.
I ram hmangaih la, i hnam hmangaih rawh. Chu chu i siamtu Pathian i hmangaih theihna kawng awm chhun chu a ni. Mahni ram leh hnam hmangaihna chang hriat loh hi sual lian tak a ni a, Pathian pawi khawihna a ni bawk.
Setana leh Pathian insualtir reng reng suh. “Pathian hnathawh Setana'n a tibuai ṭhin," pawh ti duh suh. Dawt mai mai a ni. Thihnate hi Setana hnathawh emaw i ti ang e, Chatuan Pathian remruat vek a ni a, mihringte hi a siam tirh aṭanga thi thei tûra a siam sa kan ni a, thih theihna hi awm lo sela khawvel hi hrehawmnain a khat ang. Thihnate hi mihring tân malsawmna a ni.
Hnama min siam a, chenna ram min pe a, mahni ram leh hnam Pathian thu a ni tih hriat lohna te, mahni ram leh hnam hmangaih theih lohna te, mahni ram leh hnam tâna dikna leh rinawmna hman theih lohnate hi sual, hnam pawi khawihna lian tham, leilunga Pathian remruat dodâlna sual pawi tak chu a ni.
Ram leh hnam a dam zawh loh a, hnam mipuiin inrin tawnna a neih tawh loh a, kan inringhlel vek tawh a nih chuan kan hnamah Pathian luah leh chenchilh kan awm reng reng lo tihna a ni a, kan hnam chu sual Setana kan ni mai zâwk a ni. Setana hran a awm rêng rêng lo.
Nangmaha dik lohna Setana kha dah bo la, dikna leh rinawmna Pathian kha din chhuahtîr la, ram a dam ang a, hnam a dam bawk ang.

No comments:

Post a Comment