Puithiam Rorelliana
PATHIAN THU LEH SAKHUA CHU
Pathian thu leh Sakhua hi kan rinah leh kan pawmah a awm lo a, kan rin leh kan pawm chu Pathian thu a ni bawk hek lo. Mihringte hi kan duh duh ring thei leh pawm theia siam chu kan ni ngei a, nimahsela, kan rin leh kan pawm chawp reng reng hi keimahnia awm lo, kan thu hriat atang te, zirtirna kan dawn ațang te, ni thei ngei ațang tein rinna leh pawmna kan nei thin a ni. Kan rin leh kan pawmah hian mihring min titha thei leh min tichhe thei chu a awm ngei mai, amaherawhchu, kan thatpui emaw kan chhiatpui emaw pawh ni se Sakhua leh Pathian thu anni tihna a ni chuang lo.
Pathian thu leh Sakhua chu (Zirchianna):
Pathian, Chungkhuanu-in mihringte min siamtirh khan Amah kan rin vang emaw, kan pawm vang emaw a siam kan ni lo a. Amah ring tur emaw pawm turin emaw kan la awm lo a, A remruat ang thlapin kan lo awm zawk a ni.
"Sakhua' tih țawngkam lo chhuahna hi Zoțawng thumal pahnih infin 'sa' leh 'khua' lam kawp in 'Sakhua' tih a lo ni ta a ni. Hmasanga min thlahtu kan pi leh pute khan engkim Siamtu hi a hun leh a hmun a zirin a hming lam dan chi hrang hrang an nei a. Thilnung tinrengte siamtu leh dintu a nih ang taka an biak dawn chuan 'sa' tiin an lam thin a,
a thilsiamte vengtu leh enkawltu anih vang leh a bul leh a tawp thlenga malsawmtu a nih anga an biak dawn chuan 'khua' tiin an lam thung thin. Chuvang chuan 'sa' leh 'khua' lam kawpin an hung fel ta a ni.
Engkim siamtu, chunga-mi chungkhuanu hi kan sakhua a ni. Kan rin theih hma leh kan pawm theih hma daih khan sakhua chu kan neisa tawh a. Awmlo ațanga awma siam kan nihna kha Pathian thu chu niin min siamtu Khuanu nena kan inkawpna kha sakhaw tak dinna chu a ni. Sakhua chu rinah leh pawmah a awmlo a, kan pianchhuahpui zawk a ni. I lo pian khan siamtu i neih avanga lo piang i ni a, nunga siamtu che kha i Sakhua chu a ni.
Nausena i lo pian khan sakhaw neisaa lo piangi ni a, i lo thanglian zel a, chhia leh tha hriat hran theihna leh pawm theihna i neih hnu chauha sakhua nei i ni lo. Kan rin leh kan pawm kha chu sakhua kan neihna leh kan neih chhan a ni reng reng lo. Kan ring emaw ringlo emaw sakhua chu kan pianpui, kan neihsa a nih avangin danglam chuang loin a pangngai reng a ni.
Chungkhuanu leh a siamte inkawpna hi Sakhua a ni a, he khawvela nunga a siam zawng zawng te hi sakhua neia siam vek kan ni. Mihring te leh thilnung zawng zawng hmuh theih leh hmuh theih loh pawh, kan zavaia min dintu chu pakhat, engkim siamtu Pathian chu niin; nungcha
zawng zawng te, pangpar te, thing leh mau te pawh hian rinna leh pawmna nei thei loin nei thiam lo mah se Siamtu Pathian chu kan zaa kan Sakhua chu a ni. Thliarkarah mahni chauha awmin rin tur leh pawm tur pawh hre reng reng lo mah ila min Siamtu chu ka sakhua a ni a; Sakhaw nei loin a awm theih loh zawk a ni. Chuvang chuan, khawvel hnamtinte sakhua pawh pakhat chauh niin Amah chu a thilsiam zawng zawngte Sakhua chu a ni.
Khawvel Sakhua chu pakhat a ni:
Khawvelah sakhua avanga indona lo awm emaw kan tih hi sakhua avanga indona a ni lo a, rin dan leh pawm dan hrang neih avanga indo kan ni zawk, sakhua a thleng phak lo. Sakhaw takah chuan hnam tinte hi sakhaw pakhata awmsa vek kan ni.
Hnam tinte hian min siamtu hi mahni hnam nunzia theuhin bia ila; kan biak theuh kha Pathian pakhat a tihah chiang vek ila sakhua avanga indona tur reng reng a awm lo. Kan zaa lungrual taka leilung hi luahho mai tur kan ni.
Tunah chuan i sakhua chu i hrechiang ta a, nangmah siamtu che Pathian chu i sakhua a ni a, zana i muthilh lai te, rim taka hna i thawh lai te, i siamtu i ngaihtuah reng reng loh lai te pawh khan i sakhua chuan a chenchilh reng che a; englai mahin a kalsan ngai reng reng lo che.
