Editor Picks


widgeo.net

Sunday, October 8, 2017

TAWNGTAINA

V.L. Ngaihmawia

          Tawngtaina hi tun tumah chuan i han khel ve thung ang u hmiang. Zoram Kristiante hian tawngtai hi kan uar hle mai a, zing thawh hlim te, tukthuan ei dawn te, zanriah chaw ei dawnah te, mut dawnah te kan tawngtai awl lo a nih hi. Chuti ang chu kan awm phung a nih avangin tawngtaina awmzia hi eng nge ni tih kan zir dawn a ni.

A tobul-
          ‘Tawngtai,’ tih hi Mizo tawng a nih angin a awmzia han sawi fiah dawn ila. Hmasanga kan pi leh pute kha Kristian an nih hmain sakhua an hmannaa Khawzing Pathian biaa a hnena thil an hlan laiin puithiam(sadawt) khan thiam hla chhamin a phun bel bel(a chhamphual) a, chu chu ‘Tai,’ an ti. A lam rik danah chuan miin an loah buh chi khat an chin, ‘Tai’(thar rang), an tih Favang, October thla vela thar chi an lam dan anga tawi deuh hata lam rik tur a ni. ‘Tai’ tih hi thluk fan(sei) a nih chuan a dik thei lo a, ‘darh,’ tihna a ni daih dawn a, a awmzia a bo dawn a ni. He tawngkam, puithiamin Khua Pathian hnena thil a hlan laia ‘a tai,’ an tih atang hian  Zoam Kristiante’n Isua hnena malsawmna dila an maimitchhinga an phun mawlh mawlh hi, ‘Tawngtai,’ an lo vuah ta a nih chu. A nih loh leh tawngtaina awmzia chu eng nge ni teh reng le?

Monday, September 25, 2017

THIL TAK LEH TAK LO FIAH RAWH, PATHIAN CHU HMUSIT SUH

                                                                                                                     Ph: 9612207107
1. Pathianin a mihring siamte awhna tur thang a kam em ni?
2. Nupa thei ei avangin, mihring lo piang zawng zawng leh lo la piang tur zawng zawngten Pathian lakah thiam loh changin, mi sual kan nih phah vek em ni?
3. Pathianin duh taka a siam mihringte Vanrama an kalna tur leh Hremhmun (meidil)-a an kalna tur kawng a siam tak tak i ringa maw?
4. Pathian engkim siamtu hi, Ama thil siam mihringah a rawn pian ve leh kher ngaiin, kawng a ruahman tak takin i ringa maw?
5. Pathian hian mihring Adama nupui tur Ramsa zingah a zawng em ni?
6. Rul hi mihringte thlem thei turin a tawng theih tak tak i ringa maw?
            Heng zawhnate hi i duh phawt chuan ringin i pawm hmiah thiang a. I duh phawt chuan, ring miah loin i awm thiang bawk.
             I rin miah loh leh i rin em emna khan nangmah leh Pathian inkarah, kawngro su pakhat mah a awm chuang lo.

Friday, August 25, 2017

KRISTIANNA ATANGA KAL SUALNA

                                                                                                                                       V.L. Ngaihmawia

           Khawvela sakhaw hrang hrang awm zingah hian Kristian hi an lian ber rih a, Kristian zirtirna hian khawvela hnam tam tak hi an rilru a kal sualtir nasa hle mai a, rinna dik loah a dintir nasa hle a ni tih hi chhui tham fe a awm a ni. Eng dinhmunah nge i awm lo inchhut chiang teh le.

          A hmasa bera ka han sawi lan duh chu kan chenna khawvel hi a mum a, tuipui zau pui pui panga leh tuifinriat engemaw zat a awm a, chung karah chuan khawmualpui lian tak tak paruk leh a te deuh engemaw zat bakah thliarkar  lian deuh te leh te reuh te te tam tawk tak a awm bawk a ni. Hengah hian hmakhawsang ata tawh mihring an lo cheng reng tawh a, nimahsela chung khawmual tam taka mihring chengte chuan inkalpawhna tur thlawhtheihna emaw, rel(train) emaw, motor emaw, lawng emaw an la neih loh avangin kum sang tam tak chhung kha anmahni lo chu khawvelah mihring dang an awm ve tih pawh hre loin an awm reng thin a ni.

Sunday, July 30, 2017

MALSAWMNA

 1.   Lalpa hming avanga khawvel êng hmutute,
 2.   Kan Pathian malsawmna ka entir ang che u.
 3.   Engtin nge vawiin ni thlenga malsawmnaa in dil?
 4.   An thiltih tluan ṭuma malsawmna ngai a, an beisei ang leh duh ang a thlen loh   ṭuma malsawm lohnaa ngai ṭhintute u.
 5.   Lalpa kan Pathian chuan chatuan atan nun nihnain mal min sawm a.
 6.   Dilnawn ngai lovin kan chatuan chanpual a lo ni ta.
 7.   Malsawmna kim ka dawn tâk hi.
 8.   Khawvel thil malsawm dan ka entir ang che u.
 9.   Thil engkim mai hian,
          An theihna sang berin mal min sawm a,
          Kan beisei ang hlawhtlinna leh hlawhchhamna hi,
          Malsawmnaah a chang zo ta.
10. Khawvêl miten ka chunga an tih theih sâng ber hi, ka tân malsawmna a ni e.
11. Tisa thila hlawhtlinna, Pathian malsawmnaa ngaitute u, 
        Lal hriatna reng nei lote hausakzia hi thlir teh u.
12. An thiltih zawng zawnga hlawhtling ṭhinte,
        Lal malsawmnaah lei retheihna a tel si a.
13. Tunah chuan engkim kan pualah a chan tâk hi.
14.  Aw Lalpa chatuan atan i malsawmna kim,
        Ka hmuh tâk avangin ka fak a che.
15. Ropuina leh chawimawina, thuneihna leh lalna chatuanin i ta a ni e.

Thursday, July 27, 2017

PATHIAN RAM


V.L.Ngaihmawia
Thingsulthliah.


         Bible-a ‘Pathian ram’ hi Thuthlung Thara Chanchin Tha ziakah te hian a lang nual mai a, Kohhran inkhawm ban dawn hian inkhawm hruaituin, “Lal Isua’n ţawngţai dan min zirtir angin kan ţawngţai ang,” a han ti a, ‘Lal biakna’ an tih chu chham rual a ni ta a.
          “Kan pa,
          I hming zahawm rawh se.
          I ram lo thleng rawh se, ...”
tiin chham rual a ni ţhin a ni(Luka11:2; Mat.6:10).
          Heta, ‘I ram lo thleng rawh se,” tih ţawngkam tak mai hi i han chhui chho dawn teh ang. Isuan, “I ram lo thleng rawh se,” tia ţawngţai turin a zirtirte kha a hrilh a, chuta ţang chuan tun thleng hian Kristiante hi Pathian ram lo thleng tura dilin an ţawngţai a, “I ram lo thleng rawh se,” an la ti reng mai zawng a ni a, an hnenah hian Pathian ram hi a lo la thleng lo reng nge ni a, a lo thleng tawha an hai zawk tih hi Bible aţang vek hian i han chhui dawn teh ang u.
          An ţawngţai dan tur hrilhtu ber Isua hian Pathian ram lo thleng tur leh amah Isua lo kal leh tur hi thil thuhmun angin a sawi tlat mai a. Amah Isua ţawngkam anga Matthaia ziak dan chuan, “Tih tak meuhin ka ti a che u, heta dingho a ţhente hi, Mihring Fpa a rama lo kal an hmuh hma loh chuan, thihna tem tawp lo tur an awm,” a ti a(Mat.16:28). Marka ziakah chuan, “Tih tak meuhin ka ti a che u, heta dingho a ţhente hi, Pathian ram thiltihtheihna nena lo thleng an hmuh hma loh chuan thihna tem tawp lo tur an awm,” a ti a(Mark.9:1). Luka ziakah chuan, “Dik takin ka hrilh a che u, heta dingho a ţhente hi, Pathian ram an hmuh hma loh chuan thihna tem tawp lo tur an awm,” a ti a(Luk.9:27). Johana ziak kan en leh chuan, “Ka lo kal leh thlenga awm rengah phei duh ila, chu chu enga i hman tur nge ni?” a ti a(Joh.21:22).

MIZO LEH ZO (Lusei ţawng leh Duhlian/Mizo ţawng)



V.L.Ngaihmawia
Thingsulthliah.
           
            Ka rilrua ka lo vei ve em em ţhin mi tam takin an hriat chian loh nia ka hriat ka han sawi chhuak ve teh ang. Chanchinbua chhuah atana ka khek ve rauh rauh a ni a, thu dang eng engemaw ka ziah fo avangin chhuah lo bawkin ka awm leh ţhin a. Vawi khat phei chu ziah sa thlapin ka dah a, mahse ka ziah sa chu ka hloh daih mai a; tun ţumah hian chanchinbua chhuah ngei ka duh avangin ka han ziak leh ta a ni.
            A hmasa berah chuan Zofate hi hnamkhata inzawmkhawma rorelna pakhat hnuaia awm kan duhin tun lai pawh hian kan buaipui mek pawh a ni a; he inpumkhatna hi hnam tlem kan nih avangin kan mamawh ngawih ngawih reng bawk a, ZoRo(Zo Re-unification Organisation) lam pawhin heti anga rorelna pakhat hnuaia kan awm theihna turin an theih ang angin hma an la mek tih pawh kan hria a ni. Amaherawhchu hnam dangte hriata kan inkoh dan hi ngaihtuah chian hmasak a ţul awm e.

Sunday, April 16, 2017

RAM NEITU THU



       v Lalpa chu chatuan atan Lalah a thu a, tisaah reng a chang dawn si lo.
v Mite’n Pathian tam tak be thin mahse, Pathian pakhat chauh a ding ta.
v Pa leh fapa leh thlarau thianghlim ka be lova, Pathian chu kan biain kan pawlin kan hnenah a awm tak hi.
v Tunge Pathian lo nghak kha? Tunge Pathian hnathawh lo nghak kha?
v Lalpa Pathian chu thensawmin, an hnena Pathian awm reng chu hawisanin Pathian pawimawh zawk an nghak em ni?
v Aw Lalpa kei chuan chatuan atan ka kulhbing leh innghahna lungpuiah ka hman mek che hi.
v Tuna ka hnena i awm hi chatuan atan a tawk e.
v Nang lo chu tudang mah ka nei si lo. Nang ka hnena i lo awm hian famkimna tinrengin i awm kim nghal si a.
v Nang chu hmasa ber leh hnuhnung ber i ni tak zet mai.
v Thil zawng zawng hi i rorelna hnuaiah i dah si a.
  v Ropuina leh chawimawina, thuneihna leh lalna chatuanin i ta a ni e.   

Thursday, January 26, 2017

ISUA KRISTA KHA ENGTIK THLAAH NGE A PIAN?

     Tun ṭum chu Kristiante Kût ropui tak mai Krismas(Christmas) chungchang hi i han thlur bing dawn teh ang. Kristian tam berte hian kum tin ‘Krismas’ an tih mai, Judate’n ‘Messiah,’ tia a lo lan hun an nghahhlelh em em, Kristiante’’n Messiah ni ngeia an ruat, a Grik ṭawnga ‘Krista,’ an tih Isua pian champha an lawm ṭhin hi kan Zoram khawvelah pawh a urhsun thei ang berin ran talh meuhin an lawmin an serh ṭhin a ni tih kan hre ṭheuh awm e. Heti taka ropuia an serha an lawm hian Pathian chawimawi feah chuan an inruat ve ngei  ang le.

          Amaherawhchu an Bible lam kan en chuan Seventh Day Adventist Church-hoin Chawlhni atana an hman ṭhin Sabbath(Inrinni) chu hmang tura thupek kan hmu a, Sunday hi Chawlhni atana hmang tur leh serh tura thupek kan hmu lo tlat ang bawkin Isua pian ni te, a thih ni te hi hmang tur leh serh tura thupek kan hmu hauh lo a ni. He Isua pian ni hi hmang tur leh serh tura thupek hmu sela chu a pian ni dik tak leh a thih ni pawh chiang takin an hre ngei tur a ni.

Tuesday, January 24, 2017

KRISTIANNA ATANGA KAL SUALNA

           Khawvela sakhaw hrang hrang awm zingah hian Kristian hi an lian ber rih a, Kristian zirtirna hian khawvela hnam tam tak hi an rilru a kal sualtir nasa hle mai a, rinna dik loah a dintir nasa hle a ni tih hi chhui tham fe a awm a ni. Eng dinhmunah nge i awm lo inchhut chiang teh le.
          A hmasa bera ka han sawi lan duh chu kan chenna khawvel hi a mum a, tuipui zau pui pui panga leh tuifinriat engemaw zat a awm a, chung karah chuan khawmualpui lian tak tak paruk leh a te deuh engemaw zat bakah thliarkar  lian deuh te leh te reuh te te tam tawk tak a awm bawk a ni. Hengah hian hmakhawsang ata tawh mihring an lo cheng reng tawh a, nimahsela chung khawmual tam taka mihring chengte chuan inkalpawhna tur thlawhtheihna emaw, rel(train) emaw, motor emaw, lawng emaw an la neih loh avangin kum sang tam tak chhung kha anmahni lo chu khawvelah mihring dang an awm ve tih pawh hre loin an awm reng thin a ni.

          Kum sang tam a lo ral hnu chuan Europe khawmualpui atangin hnam fing hmasa English-ho te, French-ho te, Portugues-ho te chuan lawng an lo siam thiam ta a, an bul hnai deuha mite nen an lo inkal pawh tan ta a. An lo changkang chho zel a, lawng tha zawk te an han siam thiam ta zel a, chu lawng hmang chuan ram hla zawk leh khawmual hran hran an han hmuchhuak ta zel a; America khawmual an hmuhchhuah tum phei chuan India ram emaw an ti a, a chhunga cheng hnamte chu an vun a lo sen si a, ‘Red Indian,’ an ti ta ngawt mai a ni. Tichuan khawmual dang dang an hmuhchhuah belh zel a, chung khawmual an hmuhchhuah tharah chuan mihring an lo awm ve zel si a, anmahni anpui ni hauh lo te an lo ni thin a ni. Chu chuan he kan chenna leia mihringte hi hnam hrang hrang, pianze inang lo tak tak, mi ngo te, vun ngo te, vun hang te, vun sen te leh vun eng te kan lo ni a, a then chu taksa tawi si, fuke sei thliam thluam te, a then erawh chu taksa sei si, fuke tawi te kan ni a, a then chu taksa lem leh fuke inchawih tawk deuh te kan lo ni a. chu chuan a entir dik tak chu ‘hnamkhat leh thlahkhat kan ni hauh lo a ni,’ tih hi a ni.

Sunday, January 1, 2017

HRINGNUN THLIRNA THUFING LAWRKHAWMTE - II

49. Hun hi invawn tîr lo la, nangman hun chu vawng zâwk rawh.
50. Hun i hmanthiam leh thiamloh hian, i hausak leh retheih tûr a hril.
51. Hun kal tawh chanchin hriatchian hi, hun lo la kal tur hriatchianna a ni.
52. Hun leh tuiluangin tumah a nghaklo.
53. Hun renthiam hi a punga pawisa pûktîr aiin a hlâwk zâwk.
54. I awm mai mai lai khân, mite chu an awm mai mai lo tih hre rawh.
55. I chunga thilṭha ti ṭhîntu chungah thilṭha i tilet theilo a nih pawhin, a chungah thil sual ti suh.
56. I entir aia tam nei la, i hriat aia tlem sawi rawh.
57. I  fate taimak i zîrtîr loh chuan, thatchhiat i zîrtîr a ni.
558. I hmelma hmangaih rawh, i dik lohna hriattîrtu che an ni si a.
59. I hnêna mi rawn rel ṭhîntu chuan, nangpawh mite hnênah a rêl ve leh dâwn che tih hriain fîmkhûr rawh.
60. I kuta awmlo thilte avangin in ngaihtuah buai lola, i kuta i neih thil kha a hlu thei ang bera hman tum zâwk rawh.
61. I lungawina tâwk hnathawh tur i hmulo a nih pawhin i hmuh hnaah lungawi tum ang che.
62. I nu leh i pa hmangaihna hriat i duh chuan fa nei ve phawt rawh.
63. I nupui chu a rûkin zilhla, midang hriatah chuan fak rawh.
64. I nupui duhdan i zawm lutuk chuan, rei lote-ah nupui sual i nei thuai ang.
65. I rilru hah vangin thawk lovin awm mai mai suh la, i awm mai mai vâng zâwkin i rilru tihah zâwk rawh.
66. I sualna chu englai pawhin puangchhuak la, mi sualna erawh chu zêp rawh.
67. I hianin ṭhian dang a nei tih hriain sawichin nei rawh.

668. I thiltih theihlohte hriatchhuahfo aiin, i tih theihtawk hriat a ha zâwk.