Editor Picks


widgeo.net

Tuesday, August 28, 2012

TAWNGTAINA CHUNGCHANG


           A bikin Mizo Kristiante hi han thlûr bing deuh ila, mahni’n sakhua nei ve reng chung sia mi sakhua kan \awm tlat avang hian sawi loh theih a ni lo. Mi hnam chu kan sawi phak a ni loah ngai rih mai ila. Mizote’n Kristian sakhua kan han zui ve mai chu a ni a, Bible lo pian dan te hi kan chhut ngai meuh lo niin a lang a, amaherawh chu chu lam thu zawng kan sawi tum a ni lo.
            Kristian kan han nih ve hian mi hnam aiin kan Pathian biak dân hi kan uchuak, tun lai tawng takin kan over mah mah a ni awm mang e, tih tur a ni. Kan inkhawm dan te hi a lutuk mah mahin a lang a, mahse kan chhungril lam chu eng teh ual a nih hmel si loh a. Kar khat chhungin zan tin inkhawmna hun kan nei a, Chawlhni zanah Kohhran inkhawm pangngai neiin sermon kan ngaithla a, Thawhtan zanah KTP inkhawm hun a lo ni leh a; Thawhleh zanah Kohhran hmeichhe inkhawm a lo ni a, Nilai zanah thupui neia inkhawm a ni leh a. Ninga zan emaw, Zirtawp zan emaw zawk zawk kan awl hram a, Inrin zanah inkhawm a lo ni leh a. Heti reng reng chuan committee ilo vel awm ve fote nen zana kal chhuah lo ngai fo hi nula tan te, tlangval tan te leh nu leh pa tan te pawh a tha lo a, zirlai tan lehkhazir hun tha bawh bona te, nu leh pa tan tu leh fate awp lumna hun awm lo te a lo ni a, thil dang dang pawh a ni ang. Kan ti lutuk mah mah a ni.
            Aw le, kan sawi tum loh lamah kan luh thui hmain Bible hi kan thurin bulpui bera kan hman a ni a, \awng\ai thu hi engtin nge a lo zirtir teh reng le i lo en ang u. Isua khan, ‘In duh apiang dil rawh u, in tan tihin a awm zel ang,’ a ti mai a. Kan duh duh dil hlawhtlin mai theih ni awm fahran khan a sawi a. Jakoba ve thung chuan, ‘In dil a, in dil dik loh avangin in hmu lo a, in nawmsak nan hman in tum si,’ a lo ti leh lawi si a. Paula chuan, ‘Tawngtai fan fan ula,’ a tih laiin, Isaia chuan, ‘Vawi tam tak in tawngtai pawhin ka ngaithla tawh lo ang,’ tiin a lo ziak leh bawk si a(Isaia 1:15). A va han inkawlkalh hlawm ve le! Isua hnenah khan a zirtirte khan \awng\ai dan zirtir turin an phut a. Isua khan tawngtai dan tur chu heti ang hian a hrilh ta ngei a, a awmzia i lo chhui dawn teh ang u.
Kan pa Vana mi:-
            Isua ngeiin, ‘Leiah hian tumah “Ka pa,” ti suh u, in Pa chu pakhat chauh a ni, vana mi khi,’ a ti tlat mai. Hei hian Pathian chu pakhat chauh a awm a, vana mi chauh lo chu tumah Pathian dang an awm loh thu a sawina a ni nghal a, amah Isua pawh Pathian biaka biak loh tur tihna a ni.
I hming zahawm rawh se:-
            Hman lai Israel-te chuan an Pathian Jehova chu an zah em em mai a, a hming pawh hi a nazawngin an lam ri mai mai ngai lo. An dan lehkhabuah pawh, ‘Lalpa i Pathian hming a naranin sawi suh,’ a ti. Zofate pawh hian an Pathian hming hi a naranin an sawi mai mai khat viau asin! ‘Chunga Pathian,’ tih te, ‘Khawzing Pathian,’ tih te chu an lam zauh zauh a, a hming tak hi tunah pawh mi nazawng hian kan hria em ni? Keini’n Pathian hming hi kan tihzahawma kan tihzahawm loh theih pawh a ni lo a, a hming a narana kan lam loh te hian zahawmin a lang mai thin zawk a ni.
I ram lo thleng rawh se:-
            Bible han en hian, ‘I ram lo thleng rawh se,’ tia kan dil avanga thleng tur niin a lang lo a, Pathian thlarau keimahnia a lo awm hian Pathian ram chu keimahniah a lo thleng reng tawh a ni tih hriat mai hi a lo tawk reng a. ‘Pathian ram chu in kawchhungah a awm tawh reng a ni,’ a tih ang khan.
I duh zawng vana an tih angin leia mi’n ti rawh se:-
            Isua khan leia mite’n Pa duh zawng vana an tih anga an tih ve theihna turin a zirtir a, nimahsela a thu anga zawm duh si loin, ‘Lalpa, Lalpa,’ an ti chamchi mai si a, a ning deuh a ni mahna, ‘Engati nge nangni’n ka thu zawm si loin, “Lalpa, Lalpa,” mi tih thin?’ tiin a zilh nghe nghe a nih kha.  Keini Zofa Kristiante pawh hian, ‘Lalpa,’ kan ti zing ut mai a; ‘Pathian lehkha in chhiar ngun thin, a chhungah chatuana nunna awma in rin avangin, nimahsela nunna nei turin ka hnenah in lo kal duh si lo,’ a tihate hi kan nih duh hmel khawp mai! Chuvangin Pa duh zawng tih dan hriat a pawimawh a ni.
Vawiinah hian kan ei khawpin chaw min pe ang che:-
            Tun laiah hian, ‘Ni tin kan ei khawpin chaw min pe ang che,’ tiin kan chham \hin niin ka hria a. Kan dil dan leh kan khawsak dan hi a inmil thei lo reng reng mai a, ni tina ei khawp chauh dil sia kum khat tla mai pawh duh tawk loa kan inchhek khawl vak lawi si nen hi chuan a inrem thei thlawt lo a ni e. Heta ei khawp a sawi hi kan ‘dal bhat’ lam pang hi chu a nih hmel loh tlat lehnghal, Pathian thua inchawmna lam a kawk deuh tlat. ‘Chu ramah chuan tam ka tir ang a, chaw tamna ni loin, tui tamna ni hek loin, Lalpa thu hriatna tamna zawk chu,’ a tih ang kha a ni zawk awm e.
Kan batte min ngaidam ang che:-
            Tirhkoh Paula chuan Isua tuarna ringtute chungchang thu a sawinaah chuan, ‘Batna lehkha thupeka ziak, kan chunga awm min dodal \hina chu kros thisenin a thai bo ta,’ tih thu a sawi a. Hmasang ata Judate chuan an eng ilo bate chu kum sarihnaah ngaihdam kum an nei thin a, chutah chuan sual ngaihdam kum angin Isua khan batna lehkha thupeka ziak chu a thai bo niin a sawi a ni. Chuti chuan, ‘ang che, ang che, ang che,’ tih duah duah pawh khi dil avanga thleng tur ni loin, Pathian thlarau neitute tan chuan thleng sa vek zawk a ni si a. ‘In dil chu hmu tawhah inruat rawh u, ti chuan in hmu ang,’ tih a nih reng kha. Chuti loa, ‘Aw Lalpa, aw Lalpa,’ tih tih mai ringawt chu, ‘Lalpa, Lalpa,’ mi ti nazawng chu van ramah an lut lo ang a, ka Pa vana mi duh zawng titu erawh chu an lut ang,’min lo tih khum ve dah reu reu ang tih a hlauhawm alawm maw le. A thlaraua khah lohthlak em alawm.
            Farisaiho \awng\ai dânte kha a dem hle mai a, kawng peng \huam takah te ding chungin an \awng\ai a, an au vak vak a, an sawi ngai an sawi an sawi nawn mai a. An \awng tam avangin hriain an ring a ni. Nangni erawh chuan chuti angin ti ve suh u. Amah in dil hmain engte nge in mamawh in Pa vana mi’n a hre vek a ni tiin Isua a zirtirte kha a hrilh a nih kha. Keini pawh hi dil lo mah ila kan mamawh chu hre lo khawpa Pathian mawl kan nei hlei nem maw le. ‘A ram leh a felna zawng hmasa zawk’ turin min ti a, chu mi kan neih chuan thil dang zawng zawng pawh min pek belhchhah dawn a nih zawk chu. Kan lungkham avanga mahni taksa dung lam pawh tawng khat lek pawha tisang thei lo khan silhfen te, ei leh in tur te lungkham em emin kan han dil a, thil dang eng engemaw kan dil teuh mai a. A tawngtai hla chham thiam deuh chu kan Amen uar deuh a, kan chham tawpah kan han amen thum huk a, ‘An lawmman chu an hmu zo tawh,’ a tih ang khan kan lawmman chu kan hmu nghal zel a ang viau a, a bak chu beisei tur a vang. ‘Nang erawh chu i \awng\aiin i pindan chhungrilah lut la, i kawng khar la, i Pa a rûka awm hnenah chuan \awng\ai rawh,’ a ti. Keini urhsun leh puithu awm em ema thu mawi em em kan han chham chhuak a, ngaih\ha awm taka kan han titawp hi zawng tisa \awng\ai, Farisai \awng\ai ang chauh kan ni \hin zawk. ‘In dil a, in dil dik si lo a, in dil dik loh avangin in hmu lo a, in nawmsak nan hman in tum si,’ a tih hi a dik viauin a lang. Paula chuan, ‘Eng hun pawha thlaraua \awng\aiin....,’ a ti zawk a ni. ‘Lawm fo ula, bang loin \awng\ai rawh u,’ a tih hi eng nge a awmzia le? Chaw ei hun te kan nei a, hna thawh hun te kan nei a, mut hun kan nei bawk a, bang lo chuan kan tawngtai hman lo a ni ti rawh u. ‘Aw Lalpa, aw Lalpa,’ tia kan dil hi chu tisa \awng\ai mai a ni a, thlaraua \awng\ai zawk turin min fuih a nih hi.

Kan chak lohna a pui:-      
            A nih loh leh thlaraua tawngtai dan chu engtin nge ni ang le? Tirhkoh Paula chuan, ‘Thlarau chuan kan chak lohna te a pui \hin a,’ a han ti a. Kan chak lohna chu engtin nge a puih le? A hma aia chak deuh hret turin em ni a puih le? Ni lah lo e. Kan chak lohna te a puih khan chak loh ral raihna lam a chawh zawk a, ‘Engtia \awng\ai tur nge tih hre lo khawp hialin a pui chak lo zawk alawm! Keini Mizo Kristian \haa inngai tam takte chu kan chak em asin! \awng\ai dan tur leh \awng\ai hla chham tur pawh kan la hre zal zal em asin! Engtia \awng\ai tur nge tih pawh kan hriat loh let der hnuah chuan, ‘thlarauin fapa chu ‘Ka Pa(Abba),’ tia auin kan thinlungah a rawn tir a, rum sawi hleih theih loha min lo \awng\aisak thu kan hre ta mai zawk a ni. Chu ngei chuan van hmunapindan chhungril berah Pa hnenah kan tan puithiam Lalber hna thawkin min lo tawngtaisak reng ta zawk a ni tih hi Kristiante Bible-in a zirtir dan chu a ni tlat mai. Chu mi hretute chuan ‘A ram leh a felna’ an lo zawng hmu hmasa tawh a, engkim hi an ta a nihzia an lo hre ta zawk a ni. Chuti anga van hmuna min dilsaktu \awng\aina avang chuan bang loin kan \awng\ai ta zawk a ni.

No comments:

Post a Comment