SAKHAW CHUNGCHANGA INKAWMNA - 7

47. Zawhna   : A nih leh Israel hnam sawm bo an sawi fote hi tute nge an nih a, khawi laia awm nge an nih le?

    Chhanna   : Kum B.C 1200 bawr vel khan Israel-hote chuan Aigupta sala kum 430 an ṭan hnuin Palestina ramah an lo kir leh a; roreltute hnuaiah an awm hnu khan lal neih an duh ta a. Zawlnei Samuela chuan Israel lal hmasa ber atan Saula chu hriak a thih ta a ni. Lal Saula dawtah Davida a lal leh a; tin, Davida fapa Solomona a lel leh a. Solomona a thih chuan Rehoboama a lal leh a, hei hi B.C 931-913 vel niin an ziak

                             Heng hun lai hian Palestina ram chhim lamah chuan Juda hnam te, Levi hnam te leh Benjamin hnam te an cheng ber a, chungte chu “Israela,” an tih Jakoba fapa 12-te zînga Juda thlah te, Levia thlah te leh Benjamina thlahte kha an ni. Tin, Palestina ram hmâr lamah chuan Reubena thlah te, Simona thlah te, Isakara thlah te,Gebuluna thlah te, Josefa fapa pahnih Manasea thlah te leh Ephraima thlah te, Dana thlah te, Naphtalia thlah te, Gada thlah te leh Asera thlah te an cheng leh ber a, chûngte chu Jakoba fapa pakuate thlahte chu an ni. Jakoba fapa naupang ber Josefa hian Aigupta ramah khan fapa pahnih a lo nei hman a, chu mite chu Manasea leh Ephraima an ni a, chuvang chuan Josepha thlahte hi hnam hnih angin an sawi ṭhin a ni.Chutichuan Palestina ram chhim lamah hnam thum an cheng a, hmâr lam ramah hnam sawm an chêng a nih chu.

Chutichuan Solomona thih hnu khan hmâr lam ram hnam sâwmho chu Juda lal Rehoboama lakah an hel a, Israel ram chu rorêltu pakhat hnuaia awm ṭhin kha lalram hnih Juda lalram leh Israel lalramah an lo inṭhen ta a, a chhim lam chu chu Juda lalram niin a hmar lam chu Israel lalram tia hriat a lo ni ta a. Kum B.C 931-ah chuan chhim lamah Rehoboama a lal a, hmar lamah Jeroboama a lal ta a ni. Tichuan, lalram pahniha an inṭhen aṭang chuan kum 160 vel a liam hnu, hmar lam Israel lalrama an lal hnuhnung ber Hosea (zawlnei lo zawk) a lal lai B.C 723-722 velah khan Assuria (Tuna Syria) sawrkar chuan Israel lalram chu rawn rûnin a hneh a, hnam sawmte chu salah a hruai fai ta vek mai niin an sawi a; chuta ṭang chuan hmar lam lalram Israel chu sawrkar ang chuan a awm ta lo a, “Israel hnam sawm bote (the lost of ten tribes),” tia hriat an ni ta a, an hming pawh kha mi hnuah kha chuan Bible-ah a chuang ve ta lo a ni. Kum 1947-a chhim lam lalrama cheng hnam thumte’n Independent an hmuh leh hnu khan “Israel,” hi an hmingah an invuah leh ta a ni. Khang hnam sâwm sala an hruai takte kha Assuria khan an that vek nge, engti anga bo ta nge an nih pawh a hriat theih ta lo a ni.

                             Tin, B.C. 597-586 July thlaah Babulon lal chuan chhim lam Judai lalram chu a rûn ve leh a, Jerusalem khawpui chu a tichhia a, Judate chu salah an hruai ve leh a, tlêma zawng chu hnutchhiah an ni awm e. Mahse he mi hnu hian Persia sawrkar chuan Babulon chu rûnin a hneh ve leh a, Judate chu Persia lal Kura hun lai B.C. 538 khan Persia lal phalna angin an ramah an kir leh ṭan ta a ni.

                             Chu mi hnu chuan Judate’n Jerusalem-ah Temple lungphum an phum a, chu chu B.C 537-ah a ni. Tichuan B.C 445 khan Jerusalem kulh chhia an siam ṭha leh a. Mahse Grik lal Alexander Liana khan B.C 333 Judai ram chu runin a la a, a awp leh a. Lal Antiochus Ephiphanes-a chuan Judate a tihduhdah hle a, an temple-ah chuan vawk a hlanin a tihbawrhbânsak a, chu chu B.C 168-ah khan a ni. Mahse Judate chu an hruaitu huaisen tak Makabia hoin an hel a, Grikho chu an hneh ta a; temple chu an thianfai a, Judate chu mahnia sawrkar neiin an ding leh ta a ni.

                             Mahse he mi hnu hian Rom sawrkar lo lianin Rom sipai hotu Pompey chuan B.C 63 khan Jerusalem chu a la a, Judate chu B.C 165 aṭanga mahnia sawrkâr neia an ding chu kum za chuang awrh an zalen hman a, Rom awpna hnuaiah an tlu lût leh ta a nih chu. Tichuan 70 A.D-ah khân Rom sawrkâr lakah an hel leh a, an hlawhtling ta si lo a, Jerusalem chu Rom chuan a tichhe vek a, Juda mi tam tak an that a, an thah bângte chu ram dangah sala hruai darh vekin an awm ta a ni. Chuta ṭanga an hnam zalen lehna chu kum 1947 chauh kha a ni. Judate hi ram hrang hrangah hian an darh nasa hle a ni. Tin, hnam sâwm bo tate kha khawvêl ram hrang hrangah an darh niin an sawi a; abikin keini Zo hnahthlâkte ngei pawh hi Sap (mingo) ṭhenkhat leh keimahni Mizo zînga mi ngei pawh hian Israel hnam sâwm bo tate kha ni ta hiala inngaihna an nei a ni.

48. Zawhna   : Hman deuhah khan Mizote hi Israel hnam boah khan inngaihna a awm lian hle a a, tûn thleng pawh hian “Bet Israel” invuah pâwl hran an awm a, Judaism lo zui tate pawh an awm bawk a. “Manasea thlah” nia inngai te, “Ephraima thlah” nia inngai te an awm zut mai. Tin, Pastor Liangkhaia khan, “Nova fate pathum zînga Japheta thlah kan ni,” a ti ve bawk a ni awm e. A enga pawh chu lo ni sela, an han sawi dânah chuan heng an han sawite zinga tu ber emaw thlah hi chu kan nih hmel riauin ka lo hria a, eng nge i ngaihdân le?

    Chhanna   : Ephraima thlah pawh kan ni lo a; kan sawi tawh ang khan Ephraima chu Jakoba fapa naupang ber dawttu Joseph a fapa naupang zâwk a ni a; tin, Manasea chu Joseph a fapa upa zawk a ni leh a. Jakoba aṭang hian a thlahte zawng zawng chu “Jakob-ho,” tiin an lam a; a nih lo vek leh, “Israel-ho” an ti ṭhin. Jakoba (Israela) fapa sâwm leh pahnihte aṭangin Israel hnam sawm leh pahnih an lo chhuak a ni.

                             Tin, Jakoba pa chu Isaka a ni a, Isaka pa chu Abrahama a ni leh a; he Jakoba unaupa (a phirpui) hi Esauva a ni leh a, Arab hnam zawng zawngte hi Esauva thlah niin an sawi. Hei lo pawh hi Jakoba pa Isaka hian pianpui dang a nei a, chu chu Ismaela a ni. Ismaela nen hian Abrahama fa ve ve ni mah sela an nu chu a hrang a, Isaka nu chu Sari a ni a, Ismaela nu chu Hagari a ni thung. Jakoba leh a thlahte Aigupta rama kum 430 sala an zu tân chhûng khân Kanan ram (Palestina ram) lamah chuan Ismaela khan thlah tam tak a lo nei hman a; Israel hnam Kanan rama an lo kir leh laia an hmêlma do ṭhin Kananhote kha Ismaela thlahte an ni a, tûn thlengin, “Palestine mi” an tih, Israel-hoin an la do an la dote khu an nih khu. Tichuan a tawi zawngin Adama thlah vek an ni a, keini Zofate hi chu Ephraima thlah kan ni lo a, Manasea thlah kan ni bawk lo a, Japheta thlah pawh kan ni bawk lo a, Adama thlah zingah kan tel lo hrim hrim a ni.

49. Zawhna   : E khai! Zawh tur che ka ngah dawn lutuk. A hmasain (a hmasain la ti chauh ila) Israel thlah kan nih theihna hi an han sawi aṭang hi chuan awm ang deuh deuh a tam mai. A pakhatnaah chuan “Kan D.N.A,” tih vêl leh “Kan samzai a kawrawng,” tih vêlah te hian.

    Chhanna   : Heng thil hi chu keini ang hriat ve phak a ni lo a, hnial ngaihna pawh ka hre lo. “Mahse” han ti ila, hnial hrat tak ang deuhin, khawvel mihring tam dan ngaihtuahin kan taksa pian dan zawng zawngah te hian inang lo vek em em te chuan kan awm seng dawn em ni? India ramah ringawt pawh mihring tluklehdingawn chuang kan awm hi.

50. Zawhna   : A nih loh leh kan inthawi dân leh kan kut hman ṭhin dân te pawh hi zaah zain inang lo deuh mah sela a inang hlein an sawi asin!

    Chhanna   : Kan sawi tawh angin khawvelah mihring heti zozai hnam awm ta chu inanna mual mual chhe te tal chu awm awm tak a ni. Mahse kan inthawina ran hman ṭhinte hi han ngaihtuah  ila. Israel-ho chuan inthawina atâna ran an hman ṭhinte chu - bâwng te, kêl te, beram te leh parva te hi an ni hlawm a. Israel-hoin inthawina atâna an hman ṭhin zînga Mizoin an lo hman ve ṭhin awm chhun chu ‘Kêl’ chiah hi a ni. Mizote’n inthawina atâna ran vulh an hman ṭhinte chu - ar te, ui te, kêl te, vawk te leh sial te a ni. sawi tur ting chuan khawthlang lamah Rivung lal pakhat Chungvunga chuan a pu Vanpuia’n sial zaa khuang a chawi chu   thik deuh ni awm takin Bengali Raja nena inremsiamin sial leh sai an inthleng a, saiin khuang a chawi a ni. Hei hi Zofate zinga saia khuangchawi awm chhun a ni awm e. Heta “inthawi,” tia ka han sawi hian, Israel hnamte chuan ranin Pathian hnenah an sual thawina an hlân ṭhin a. Keini Zofate chuan kan tihsualah sual thawina atan ran chu hlan ve tho mah ila, kan sakhaw hmanna tam ber leh kan Pathian biakna tam bera ran kan hlan hi chu “inthawina” anga sawi theih a la ni lo lehnghal. Chu chu sual thawina a ni lo tihna a nih chu.

51. Zawhna   : Kan pi leh pute chuan khawthlang lam aṭangin khawchhak lam an pan a, chuta ṭangin tuna kan luah ram hi an pan leh ta niin an sawi a; an Sikpui Kut lam hla pawh hian Tuipui Sen  (Red Sea) an kan ngei a ni tih a lang e, an ti a. Han ngaihtuah chuan Tuipui Sen kan hla a ang hle mai.

    Chhanna   : Mizo pipute khan Tuipui Sen (Red Sea) an kân awzawng lo mai. China ram aṭangin Burma (Myanmar) ramah lui pakhat rawn luang lut chu a hmingah, “Hong-he,” an ti a. Mizo ṭawng chuan, “Tuipui sen,” tihna a ni. A hnar lama lei sen awm chu he lui hian a len chângin a hrût thla tel ṭhin a, chu chuan tui chu a tisen nguai nguai  thei a, chuvangin he lui hi “Hong-he,” an ti. “Hong,” chu “Sen,” tihna a ni a, “He” tih chu, “Tuipui,” tihna a ni; Chinese ṭawng a ni awm e. He luipui hi kan pipute thlangtla khân an rawn pal tlang thla niin an sawi a, chuvang chuan he Tuipui Sen kan hla ni awm taka an ngaih hi an phuah ta niin a lang. A hla chu-

                             “Sikpuiin thang ka ur laiah,

                             Chang tuipui sen ina hrilin kan intan;

                             Tera lawna, ka leido aw,

                             Sunra zula, ka leido aw.

                             Laimi sa ang chang tuipuiin lem zo,

                             Sunah sun ang,zanah meiin vak e;

                             A va rual aw la ta che,

                             Suanglung chunga tui zuang put kha la ta che,” tih a ni e.

52. Zawhna   : A nih leh kan pipute chu hnam sâwm bo tate zînga mi kha niin, an kal bona aṭanga an haw leh theihna turin kawng chhinchhiahna te siama, kawng kawhhmuhnate phun turin zawlnei Jeremia pawhin a ziak a ni an ti si a.

    Chhanna   : A dik alawm. Kan sawi tawh ang khan Israel lalram chu hnam sawmho chênna kha a ni a, chutah chuan Josefa thlahte, Mansea hnam leh Ephraim hnam an cheng ve bawk a. He hmar lam lalrama chengte hi an hnam pumpui kohna atan “Ephraima” tiin a hmang a. Kum B.C 722 vêl khân Assuria chuan a bei a, a hneh a, an vaiin salah a hruai fai vek a ni kan tih tawh kha. Zawlnei Jeremia chuan sala hruaia an awm kha a lainat hle a,

                             “Ephraima chu ka fapa duh tak,

                             Ka nau ngainat tak a nih vang em ni,

                             Amah ka thunun apianga ka thinlungah a chen tlat ṭhin ni?

                             Tichuan ka thinlungin a lainat ṭhin a,

                             A chungah zah ka ngai dawn a ni,

                             Tih hi lalpa thuchhuak a ni,”

                     tiin a chham chhuak ta a ni (Jeremia 31:21). Kan pipute an tel lo.

53. Zawhna   : Rakili pawhin an sal tang tur hi a ṭah zui ni awm takin an sawi a?

    Chhanna   : Nia. Rakili hian an sal tang tur an hmelmate’n an hruai liam takte chu ngaia ṭap ni awm fahranin Jeremia hian a ziak a.

                             “Lalpa chuan heti hian a ti,

                             Rama khuaah thawm an hria,

                             Mitthi ngaia ṭap tlawk tlawk,

                             Rakili’n a fate a ṭah a,

                             A fate an awm tawh loh avangin,

                                        Thlamuan theih a ni lo,”

                     tiin (Jeremia 31:15)

                             “Ephraima in ṭah chu ka hre lul mai...,”

                               a ti leh bawk (Jeremia 31:18)

                               Heti ang hi ni mah sela, Israel hnam sâwmho sal tâng bo tate hi an nu Rakili hian a ṭah awzawng lo tih hriat bawk tur a ni. A chhan chu an pu Jakoba dam laia Aigupta rama an pem thlak kha kum B.C. 1876-ah a ni a; an pem thlak hma khan Jakoba fapa naupang ber a piang a. Benjamina (Jakoba fapa naupang ber) a nu Rakilin a hrin khan Rakili chu raichehin a thi a ni. Rakili thih hnu kum B.C 1876-ah Jakoba leh a chhungte chu hnama chhiar theih pawh an la ni lo a, chhungkaw member 70 an tling tawh tihin Aigupta ramah chuan an pêma; kum 430 lai Israela thlahte chu Aigupta rama an awm hnuin kum B.C 1446 bawr velah emaw an lo chhuak leh a, a hnu lam pawh a ni zawk mai thei. B.C 1200 vel hi Kanan ram an lo luh leh hun niin an ngai deuh ber hlawm. Tichuan Kum 722 B.C vel kha Assuria-in sala a hruai hun chu a ni ta a. Rakili thih leh an sal tan (Assuria sala an tan) inkarah kum 1100 chuang daih a tla a ni. Rakili’n a fate sala hruai bote a ṭah anga a sawi hi Matthai phei chuan Isua pian dawna Jerusalem vela nausente Heroda sipaite’n an suat vek avanga an nute’n an fate an ṭahna angin a puh daih zawk a ni (Matt. 2:18). An thu hi a intu lo tlang khawp mai.

54. Zawhna   : Bible ṭan chhana an sawi pakhat chu: “Ephraim chuan thli a ring a, khawchhak thli a zui ṭhin,” tiin Bible-ah a ziak a. Mizo pipute chuan khawchhak thli an zui avangin khawchhak lamhawiin China ramah an lut chho a, chuta ṭang chuan tûna kan chênna hi an pan thla leh niin an sawi ve tlat mai a. Han chhiar chuan a rinawm ve thei tlat a ni.

    Chhanna   : Ni e ti rawh. eng pawh ni sela, zawlnei Hosea lehkhabu aṭanga he lai thu hi an lak chhuah a ni a, Hosea chuan,

                             “Ephraim chuan thli rinrawlah a nei a,

                             Khawchhak thli chu a zui ṭhin a;

                             Dawt thu leh ṭiavaina thu a tipung tial tial a,

                             Assuria nen thu an thlung a,

                             Aigupta lamah hriak a phur lut a ni,”

                     tiin a ziak a ni (Hosea 12:1).

                             Hosea hi B.C 738 vel bawr laia hmar lam Israel lalram leh chhim lam Juda lalram inṭhenah a hmar lam Israel lalram zawlnei awm kha a ni a, Israel-ho Assuria sala an tân dawn thleng pawh khan a la awm pawh a ni mai thei. B.C 931 vêlah khân Israel lalram chu lalram hnihah an inṭhen a nih kha.Hosea chu B.C 743-722 emaw, Assuria-in Israel a hneh thleng khân a awm a ni mai thei e, Israel ram zawlnei a ni.

                             Chutichuan Israel ramah leh Judai ramah zawlnei an awm ve ve a, chung hun lai chuan Judai ram leh Israel ram chu lalram hniha an lo inṭhen takna chhanah khan a lehlam lehlam chuan thiam lo zawkah an inpuh tawn a. Israel lamin Juda lalte sual vangah an puh a, Judai ram lamin Israel hruaitute sualah an puh ve bawk a; chutih hun laia Hosea thu sawi chu kan tarlan tak hi a ni. Hosea chuan

                             “Ephraim cchuan thli rinrawlah a neih a,”

                     a han ti a. Thli chu boruak mai, boruak fâwn vêl a ni mai a, taksa tâna han eia intihpuarna chi a ni lo a, “Engmah lo mai maiah a inhambuai a,” tihna tluk a ni mai a.

                             “Khaw chhak thli a zui ṭhin a,”

                     a ti leh a, “Khaw chhak thli,” a tih hi khung lai Middle East velah a tleh ṭhin a ni ang, Phian thu thiamho (Kristian Theologian te) chuan siroeco thli a ni e an ti. “Khaw thlang thli,” a ti lo a, “Khaw chhak thli,” a ti a ni tih hre chiang phawt ila. Mizoin, “Chhim thli,” kan tih chu chhim lam aṭanga hmar lam hawi zawnga thli lo thleh hi a ni ṭhin a; “chhuah thli,” kan tih pawhin ni chhuahna lam aṭanga a tlakna lam hawia thli lo thaw hi a ni leh a. Chuti ang bawkin Saphoin “Land breeze,” an tih chu khawmual aṭanga tuipui lam hawi zawng thli thaw kha a ni a; “Sea breeze,” an tih chuan, tuipui lam aṭanga khawmual lam hawia thli tleh kha a ni zel a. Kan naupan laia Kristian naupang sunday school-a Paulate Medditeranean tuipui an zin laia an lawng thliin a tihchhiat thu hlain kan zirtirtute’n min sakpui ṭhin chu-

                             “Hmar thlipui Eurokuilo chuan a rawn nuai vel a...,” tih a ni a. Thli hming reng reng hi a thli rawn kal ṭanna lam hi hmingah an lo chawi chhan zel niin a lang; Mizo leh sapah chuan, Middle East lamah pawh a nih tho chu. An khawchhak thli kha khaw thlang lam hawi zawnga tleh a ni tlat mai. Ephraim chuan  khaw chhak thli a zui a nih chuan khawthlang lam pana kal awm tak a ni. Sawi fiah vek lo mai ang, thu a tam e. A tlar tâwp berah hian,

                             “Aigupta lamah hriak a phur lut a ni,”

                      a han ti leh a. Hetah phei chuan a chiang leh zual ta. Israel ram lam aṭang chuan Aigupta chu khawthlang lam a ni tih kan hai lo ang; Ephraim hnamin hriak an phurh luhna chu an ram aṭanga khawthlang Aigupta ramah a nih chu. Chuvangin, “Khawthlang thli an zui avangin khawchhak lamah an chho a ni,” tih pawh ni hlei lo, khawchhak thli an zui avânga khawchhak lama kal ta anga kan pipute han ruat tlat chu thil chhut dân mâwl leh nuihzatthlâk tak a tling âwm e.

55. Zawhna   : A ni dawn tak maw. Chuti lo ni sela, Zaithanchhûngi sawi dân an sawi chhâwnah chuan, “Kum B.C 722-ah khan Assuria lal Salmanesser-a chuan Israel chu hnehin salah a hruai haw a; Halah, Habar leh Gozan lui velah a dah a. Persia lal Darius leh Ahashuerosh lal laiin Mansea-ho chu Persia ramah an awm leh a. B.C. 331 kuma Macedonia leh Alexander liana khan Persia te, Afgahnistan te leh India te a hneh ṭum khan Manasea-ho chu Afganishtan lam panin an kal zel a. Tibet leh China ram chhûngah an lût thûk telh telh a. B.C 231 kum khan Kaifeng-ah an inkhuar ta a.

                             Heta an awm lai hi Chinese-ho chuan sal chhawrin an chhawr a, Chinese-ho tih dân phung te chu zâwi zâwiin an la chhâwng a, an lo inchiahpiah ta a. An inhrek behna avangin an zînga mi ṭhenkhatte chu tlâng ramah te tlan boin pûkah te an khawsa ta a. Chu vangin “Pûka chêngte (Tha cave people),” tih emaw, “Tlang rama chengte (The people of the mountains),” tih emaw te chu an lo hlawh ta a ni. |hang hnih lian chhûng vêl chu chûng pûkah chuan rethei deuhin an chêng a. Chuta an awm chhûng chuan “Sefer Jovah (Savun lehkha),” an kawl ṭha reng a. Pûk aṭang chuan um chhuahin an awm leh a, hetih lai hian Sefer Jovah chu chinese-hoin an ruk bosak nge ni, an tibo daih a, chuvang chuan an dân leh hraite chu Puithiamte’n thu leh hlain an inhlân chhâwng ta zel mai a ni

                             Pûk tam tak awmna ruam ‘Kawil’ emaw ‘Sin Lun’ emaw aṭang chuan khawthlang lam panin Thailand te, Kila Valley te leh Kendi tlâng te an kal pel zêl a,Lantechuan leh Shan an thleng a, chuta ṭang chuan Burma an lut a. Lui dung zawh zelin Mandalei an thleng a, chuta ṭang chuan Chin tlang dung an rawn chuan ta a ni,” an ti a (Hei hi Israel - Zaithanchhungi P.422-423). An sawi dan aṭang chuan a awm ve hle asin.

Chhanna      : Ni e, an sawi dan hmang leh an ṭan chhan han bihpui chuan awm ve viau chuan a lang a ni. Mahse han chhut chiang mah teh. Kum B.C 722-a Assuria sawrkarin hnam sawmho chenna hmar lam lalram Israel a hneh a, salah a hruai a, B.C 331 velah Afganishtan an rawn pan zel a, kum B.C 231-ah China ram chhunga Kaifeng an lo thleng tih te chu phat rual a ni lo e. Mahse Zo hnam pipute erawh chu khu lam ram aṭanga rawn chho ni loin, khawchhak rama lo awm sa, khawchhak lam mi dik tak, thlah hrang daih an nih avangin Manasea hoin B.C 231 velah China rama Keifing hmun an thleng a, chu mi hma daiha thil awm chu China mi thiamte chuan kum 1980 velah khan an ram chhimthlang lamah Zo miṭha thlan an hai chhuak a, chu chu B.C 770 lam daiha mi a ni tih an sawi kha chanchinbu lamah pawh an chhuah a, chu mi vek chu India ram chanchin lar tak Amrita Bazaar Patrika pawhin a rawn chhuah chhawn ve kha. Zo pi leh pute chuan an thlangtlak hma daih B.C 300 leh a hma lamah te khan China-a an awmlaiin lal neia an awm thu Mizo chanchin ziaknaah kan hmu a ni. Chuvang chuan anni leh keini chu thlahkhat ni loin thlah hrang daih ve ve kan ni.

                        http://hnamsakhua.blogspot.in/2014/07/sakhaw-chungchanga-inkawmna-6.html

                        http://hnamsakhua.blogspot.in/2013/10/sakhaw-chungchanga-inkawmna-5_12.html
http://hnamsakhua.blogspot.in/2013/09/sakhaw-chungchanga-inkawmn-4_8029.html
http://hnamsakhua.blogspot.in/2013/08/sakhaw-chungchanga-inkawmna-3_26.html
http://hnamsakhua.blogspot.in/2013/07/sakhaw-chungchanga-inkawmna-2.html
http://hnamsakhua.blogspot.in/2013/07/sakhaw-chungchanga-inkawmna.html