SAKHAW TANA INPEKNA

          Mihringte kan nun leh kan hun pumpui a tâna a hnukpui ber chu Sakhua hi a ni a. Motor hi a pumpui hian an hlu em em vek a, a engine tello chuan khawiah mah a kal thei lova, thîr awm khâwm satliah a ni mai ang hian mihring pawh hi sakhaw tello chuan leitlang hlawm chikhat awm ve mai chauh kan ni tho mai.

SAKHAWMI: Mi tam takin, ‘sakhawmi ka ni lo,' te an ti ṭhîn a, sakhawmi an tih chu eng ang nge ni ang le? Zohnam Kristiante chuan sakhawmi ti a an lam chu Isua fak a zai peih leh lam ṭhîn Isua hming a thil tihna tinreng ngai pawimawh em em hi ‘sakhawmi' an tih chu ni ber in a lang.

Biakin lam ngaihsak hlek lo ṭawngṭai ve vak lo Isua chanchin sawi ngai lem lo Kristian sakhaw hmalakna lam hawi a tel ve vak lo awm mai mai hi ‘a sakhaw mi lo' an tih ṭhin chu a ni a.

SAKHUA HRE LO TEN SAKHAWMI AN HRE LO: Mizo mipui tam berte hian kristianna hi kan sakhua emaw an ti ṭhîn a, chuvângin Kristian hmalakna kawnga an inpêkna kha sakhaw tâna inpêknaah an ngai ṭhîn, Kristianna hi Zohnamte sakhua a ni hauh si lova.

SAKHAWMI DIKTAK CHU: A hnathawh kawng tinrêngah rinawmna leh dikna a lang chhuak a, dikloa thil a tih chuan siamtu Chungkhuanu pawi khawihna ani tih a hre tlat.

Amah chu a hawih hawmin mi tumah a chungtlâk ngai lova, a nun a ngîl a, a mihringpui tumah huat bîk a nei ngai lo. Ṭawngkam bawlhhlawh a hmang ngai lo a, a ṭawngkam pawh mite thlamuanna hawi zawngin a tawng chhuak ṭhîn.

A ka aṭangin dawt a chhuak ve ngai lova, sum eng pawh kawl tîr ila, a vawng him a, rorêltu a nih pawhin thlei bik leh duhsak bik nei lovin ro a rêla, ama ṭanghma hai zâwngin ke a pen ve ngai lo.

Hnathawh ho nikhuaah a zelthel zîngah a tel ve ngai loa, a tlin tâwk ah a thatchhe ngai lo.Pathian Khuanu thilsiam nungcha zawng zawng te zahawmna hre felin englai mahin a ti duhdah ve ngai lo, A siam tu pawi khawih palh hlau mi a ni ṭhîn.

SAKHUA: Sakhua hi rin chawp emaw, pawm chawp emaw, awih chawpah emaw a awm rêng rêng lova, mi tupawh an lo pian chhuah hian a sakhua chu a pianpui tel nghal thlap a, rin a ngai lova pawm a ngai lova, Amah siamtu Pathian Chungkhuanu nên a inthenhrang hlek lova, inkawp nghal thlap a lo piang chhuak a ni. Amah siamtu nêna an inkawp tlatna kha a sakhua chu a ni a, a siamtu Pathian duh dâna a nun-na kha a sakhuana chu a ni nghâl zâwk a ni.

SAKHAW TANA INPEK: Mi tupawhin an mahni siamtu Chungkhuanu duh dâna an nunna kha a sakhaw tâna inpêkna chu a ni a, kan ram leh kan hnam a lo din chhuah theihna tûr a rinawmtak leh diktak a ram leh hnam tâna kan thawh kha sakhaw tâna inpêkna a nih reng laiin sakhaw thu leh hla lam hawia penchhuah pawh nise, eng lam hawi pawh a biru lova inpêkna kha mahni tâna hlawkna awm reng reng lo mahse ṭhulh chuang miah lo inpêkna kha sakhaw tân a inpekna a ni a.

Sakhaw tan a inpekna khan mi a chungtlâk ngai .lova, mi te manganna leh lungngaihna leh natna a chhâwk zâng khai zâwk ṭhîn.

Sakhaw tâna in pek na chuan mahni tâna pawimawh leh chhungkaw tâna pawimawh a dah hmasa ngai lova, tih tûr awm ah chuan a sakhaw tân a tih târ awm chu a dah hmasa ber ṭhîn, mahni inhaivur hmasak a turn ngai lova, a chan phah hial tûr pawh nise, a sakhaw hmalakna chu hma a hruai tîr tho tho ṭhîn a ni.

Pathian Khuanu min hruaina kha en ran i la, a thu chu keimahniah Lal tîr ber ila, thil dang zawng zawng hi chu a pahnihna-ah dah vek ila, chutin Pathian kawng kan zawhnaah kan che sual ngai lovang.