MIZO LEH ZO (Lusei ţawng leh Duhlian/Mizo ţawng)

V.L.Ngaihmawia

Thingsulthliah.

           

            Ka rilrua ka lo vei ve em em ţhin mi tam takin an hriat chian loh nia ka hriat ka han sawi chhuak ve teh ang. Chanchinbua chhuah atana ka khek ve rauh rauh a ni a, thu dang eng engemaw ka ziah fo avangin chhuah lo bawkin ka awm leh ţhin a. Vawi khat phei chu ziah sa thlapin ka dah a, mahse ka ziah sa chu ka hloh daih mai a; tun ţumah hian chanchinbua chhuah ngei ka duh avangin ka han ziak leh ta a ni.

            A hmasa berah chuan Zofate hi hnamkhata inzawmkhawma rorelna pakhat hnuaia awm kan duhin tun lai pawh hian kan buaipui mek pawh a ni a; he inpumkhatna hi hnam tlem kan nih avangin kan mamawh ngawih ngawih reng bawk a, ZoRo(Zo Re-unification Organisation) lam pawhin heti anga rorelna pakhat hnuaia kan awm theihna turin an theih ang angin hma an la mek tih pawh kan hria a ni. Amaherawhchu hnam dangte hriata kan inkoh dan hi ngaihtuah chian hmasak a ţul awm e.

Hnam hming ziah dan hrang hrangte-

             Chittagong Hills leh a chhak tlang rama chengte hi Bengali-ho chuan, ‘Kuki/Kooki/Cucis,’ an ti a; a chhunga luh chhoh zel chuan, ‘Lushai,’ tih te, ‘Shenduy,’ tih te, ‘Haulong,’ tih te, ‘Sylo,’ tih tein an lam a, mahse a hnam pum sawina chu, ‘Dzo,’(The whole Generic name is ‘Dzo’) a ni an ti(The Fly on the Wheel 1876- Thomas Herbert Lwin-pp. 246). Khawchhak lama Zofate chu, ‘Chin,’ tih an ni thung a. Assam leh Yunan inkara cheng, ‘Chin,’ tia vuah Zo chi peng hrang hrang, a tawpa ‘Zo,’ tih awm vekte chu Rev.Khup Za Go chuan 36 a ziak chhuak vek a ni(Chin Chronicle- Rev.Khup Za Go). Keini Zo hnahthlakho erawh chuan hmakhawsang ata, tuna China ram zau tak huam chhunga kan la awm lai aţangin, ‘Zo,’ tih hi kan inhriat dan a ni thung a. an ziah dan erawh chu a inang lo zung mai a, ‘Zo,’ tih te, ‘Zho,’ tih te, ‘Zhou,’ tih te, ‘Dzo,’ tih te, Zau,’ tih te, ‘Zeu,’ tih te, ‘Sho,’ tih te, ‘Shou,’ tih te, ‘Chho,’ tih te, ‘Achho,’ tih te, ‘Miyo,’ tih te leh ‘Yo,’ tih te a ni hlawm.

Kan hnam hming chu ‘ZO’ a ni-

            Prof.Catxian Beng chuan Tibet-te leh Dzo-te an indo ţhin thu leh, Great Wall of China siam laia an lal ropui Qin Shihuang-ti-in tihluih hnatlang atan mipa puitling kum 21-60 inkar hmun thuma ţhena hmun hnih thawk tura a phut ţhin chu an hnial avangin kum 214 B.C.-ah khan a um darh thu a ziak a(Tibet- Prof.Catxian Beng, Head of Department, History, Sanghai University). Tin, kum 1768-a ‘Chin-Lushai Country,’ an tih huam chhung(Chin Hills, Arakan, Sagaing Division, Southern Manipur Hills, Mizoram, North Cachar Hills, Hills of Tripura leh Chittagong Hills)-a chengte chu, ‘Dzo Dynasty,’ tiin ziah a ni(Encyclopedia Britanica-1768). Tun thlenga Zo hnahthlak chi peng hrang hrang a bul lama ‘Zo,’ tih la pu rengte chu, ‘Zomi,’ tih te, ‘Zotung,’ tih te, ‘Zophei,’ tih te, ‘Zote,’ tih te an ni a; a tawp lama ‘Zo,’ tih awmte chu, ‘Bawmzo’ te, ‘Laizo’ te, ‘Mizo’ te hi a ni. Tin, China chhimchhak bial Zheizing hmuna an mi thiamte’n thlan pakhat an hmuhchhuah chu, ‘Zhou mi ţha thlan a ni,’ an ti bawk a, chu chu kum 770-256 B.C. vela mi a ni an ti((New Agency-Hongkong 26 April, 1982 & Amrita Bazar, Calcutta 27 April, 1982). Nepal History-a an ziakah chuan “Zo hote chuan hman lai B.C. 2000-1000-na velah khan Nepal ram hmar kil hrutin khawchhgak lam an pan a,  chutih lai hunah chuan sairawkherh leh thal chauh an keng a ni,” an ti(Short story of Nepal 2025 B.C. by Ku Amika Sijapati; Modonjong Silapati; Thapathali, Purbo Dekha, Katmandu, Nepal).

Mizo hnahthlak an awm lo-

            Heng tuna kan han tar lan hrang hrangte aţang hian hmasang, tuna China ram (Yunnan Province)-a awm lai ata tun thleng hian Zo hnahthlak zawng zawngte kan inhriat dan tlanglawn ber chu, ‘Zo,’ tih hi a ni. Tichuan Zo hnahthlak nia inhria zawng zawng zinga a tam ber chuan kan inkohna atan hian, ‘Zo,’ tih hi an pawm thei vek a, ‘Mizo,’ inti thei erawh chu tuna ‘Mizoram,’ kan tih chhunga cheng Zo hnahthlakte bakah  Mizoram pawna cheng, Duhlian ţawng hmangte hi an ni deuh chauh mai a, chuvangin Zo hnahthlak zawng zawngte chu inzawm khawm a, rorelna pakhat hnuaia awm tuma kan beih mek lai hian thil nih phung hi chik taka kan ngaihtuah a ţul awm e. Ka lo hriat thawi deuh danin CYMA hruaitute ţawngkam ni awm taka an sawiah chuan, ‘Mizo,’ tihah hian lungawi tlan tum tura intihna ang lek lek te pawh a awm em maw ni? ‘Mizo,’ tia invuah phei hi chu Luseihoin Tiau an kan thlak hnuah chauh a ni.

            Ka hriat sual loh chuan Delhi Mizo Zirlai Pawlin an chhut dan chuan Zo hnahthlak zawng zawng hi  nuai 50 aţanga 70 inkar vel chauh kan la ni a, kan tlem tham em avangin ‘Mizo,’ inti ve thei lote kan inchhawk ţhen mai chuan a fel lo hle thei a ni. K.Zawla sawi dan chuan Zomi pa pakhatin a ram chhuahnaah sanghal muhil lai a rawfeiin a chhun hlum a, a lawm lutuk han au vel chuan, “Keimah Mizo pa, phulraw chawia, sa tin kapa,” tiin a hming chhalin hla thu a han chham vel a ni awm e(Mizo pipute leh an thlahte chanchin- K.Zawla p.11). Amah kha Zomi a ni a, ‘Zomi,’ tih chu hla thuin, ‘Mizo,’ tiin a han chham niin a sawi. Engpawh ni sela, ‘Mizo,’ tih hi chu tlaikhawhnu tak, Luseihoin tuna Mizoram an luah hnua lo chhuak chauh a ni. Chuvangin mi ţhenkhat thu ziak leh ţawngkam ka hriat ţhinah hian, ‘Mizo hnahthlak,’ tih hi ka hmu tamin an lam ri zing hle mai a; a hma lama kan sawi tawh angin ‘Zo’ hi chuan hnah tam tak a thlak a, ‘Mizo’ erawh hi chuan hnah pakhatmah a thlak ve lo a, Lusei hnahthlakte’n(a bikin Sailohoin) Mizoram an luah hnua ‘Mizo’ invuah chauh an ni. Lushai Hills(tuna Mizoram ni ta) chhiarpui hmasa ber 1901 kuma mihring cheng zat an chhinchhiah dan chuan, “Lusei chuti zat, Hmar chuti zat, Paite chuti zat, Pawi chuti zat, Lakher chuti zat, Ralte chuti zat,” tiin an ziak a. Hun a lo kal zel a, chhiarpui hnuhnung lam 1961 bawr vel aţang chuan heng zo hnahthlak chi peng hrang hrangte hi lo pung vek mahse an chi peng hming kha a bo ta duak a, ‘Mizo’ an lo ni ta hlawm a. Chu mi awmzia chu, ‘Mizo’ khan hnah a thlak ve ni loin, Lusei te,m Ralte te, Pawih te, Lakher te, Hmar te, Paite te kha ‘Mizo’ an lo ni ta hlawm a ni tihna a ni.

Duhlian chite-

            ‘Duhlian,’ tia an lo sawi ţhinte hi tute nge an nih le? Hmasanga Zofate chanchin ziaktute hriat dan chu a inang lo thei ang tih a rinawm a, K.Zawla chuan Sailo bul chhuitute’n Nova aţanga Zahmuaka chin hi ‘Duhlian,’ tiin an sawi bik niin a ziak a(Mizo pipute leh an thlahte chanchin-K.Zawla p.200). Nova hian fapa Dongula a nei a, Dongula chuan Ninguitea a nei leh a, Ninguitea chuan Ngeknguka leh Bawklua a nei leh a; Bawklua hi Sailoho thlahtu chu a ni. Bawklua’n Ralnaa(Galnaa) a nei leh a, Ralnaa chuan Chhuahlawma a nei leh a. Heti chin hi Run lui ral Than tlanga an awm lai niin ‘Duhlian,’ tia an invuah ţanna niin Zatluanga chuan a sawi a. Chhuahlawma chuan fapa Zahmuaka a nei leh a, Zahmuaka aţang hian Run ral an kai a, heta ţang hian Lusei hming an pu ţan niin a ziak a ni(Mizo chanchin-Zatluanga p.88). Luseia a lo lal aţangin an chi hmingah ‘Lusei,’ tih hi an lo pu ta zel a; Luseia thlah zingah mi ropui tak tak an lo awm chho a, Lamlira te, Seipuia te, Hualngoa te, Hualthana te leh Hualnema te an lo chhuak ta a ni. Ziaktu ţhenkhat sawi dan chuan Ninguia’n Guitea(Vuitea) a hring a, ‘Ngeknguka,’ tih pawh hi ‘Ngengua,’ tia ziak a ni(Zaruma thu-ro bu-Genealogical History).

           

Lusei ţawng leh Mizo/Duhlian ţawng-

            Tun hma deuh kum sawmhnih emaw, sawmthum emaw liam taah khan mi ţhenkhatin ‘Mizo ţawng,’ tih te, ‘Lusei ţawng,’ tih te leh ‘Duhlian ţawng,’ tih te an sawi ka hre ţhin a. Tiau ral chhak lama mite’n, “Mizorama in Lusei ţawng a dik lo,” an tih loh leh, “In Mizo ţawng a dik lo,” an ti a. Mizorama mite’n, “Tiau chhak lama mite Lusei ţawng hman a dik lo,” emaw, “In Mizo ţawng a dik lo,” emaw an ti ve bawk si a. Tawng hmang dik loah an inpuh ve ve a ni.

            He inpuh tawnna hi ka ngaihtuahin ka chhui ta char char a, Mizo ţawng emaw, Lusei ţawng emaw hmanga inngaite ve ve hian an ţawng hman hi an hriat chian loh ve ve vang a ni tih ka hre chhuak ta a ni. A hmasain Zo hnahthlak chi peng hrang hrangte hian mahni chi ţawng(dialect) kan nei hrang thliah thliah hlawm a; Lusei ţawng chu Luseihoin an hmangin anmahni chi ţawng bik a ni a, an ta a ni. Hmar ţawng pawh Hmar chiho ţawng bik a ni a, an ta a ni bawk a, chuti ang zelin Ralte ţawng te, Pawih ţawng te, Paite ţawng te, Thado ţawng te leh a dang te pawh a ni vek a, anmahni chi bil ţawng, an ta liau liau a niin chi peng dangin an ţawm ve ngawt lo. Amaherawhchu heng tuna kan han sawi chi peng ţawng hrang hrangte hi Zo hnahthlak chi peng hrang hrangte ţawng a nih avangin, ‘Zo ţawng’ a ni vek a ni.

            Lusei lal pakhat Khawlaichhuna fapa pakhat chu Duhliana a ni a, Rangteho(tuna Gangte inti tate) chuan lal an neih tak loh avangin Rangte nula nupuia neia an lala ţang turin an sawm a, ani Duhliana chuan a remti a, Duhliana chu Maipawl khuaah Rengte niin a ţhu ta a ni. Maipawl khuaah hian Lusei te, Hmar te, Rangte te, Sukte te leh Vuite te an inawm pawlh a. Heng chibing hrang hrangte hian veng bik neiin a hlawmin an awm a, anmahni chi peng ţawng ţheuh chu an hmang hlawm a. Chutih rual erawh chuan chung chi peng hrang hrangte ţawng inpawlh aţang chuan ţawng chi khat, inbiak pawhna atana an hman chu a lo chhuak a, chu chu, ‘Duhlian ţawng,’ an tih hi a ni. Tlangchhuahnaah chuan he an ţawng inţawm(Duhlian ţawng) hi an hmang mai a(Pipute biak hi- Rev.Zairema p.163). Maipawl khua aţanga hmun hrang hranga an pem darh leh hnuah pawh he an ţawng inţawm hman hi inbiak tawnna atan an hmang ta zel a, Zoram khawvelah chuan a lo darh ta zel a; Duhliana khua leh tuite ţawng a nih avangin ‘Duhlian ţawng,’ tia vuah a lo ni ta a ni(Mizo chanchin- Col.V.Lunghnema p.75). Chutichuan Tiau ral chhak lama mite hian Lusei ţawng kha an la hmang chhunzawm zel a, tuna ‘Mizoram,’ kan tih tak chhunga chengte hian kan inbiak pawhna atan Lusei ţawng hmang loin ‘Duhlian ţawng’ chu kan lo hmang ta a ni.

           

Duhlian ţawng hi chi bil ta a ni lo-

            A hmaa kan sawi tawh ang khan Lusei ţawng chu Lusei chite ta, an chi bil ţawng a ni a; Ralte ţawng pawh Ralte chite ta, an chi bil ţawng a ni a, Paite ţawng pawh Paite chite ta leh an chi bil ţawng a ni. Chuti ang zelin Mara ţawng te, Lai ţawng te, Hmar ţawng te leh a dang dangte chu a chi bil neitu, ţawng neitu chi bil awm vek a ni. Duhlian ţawng erawh chu chi bil ţawng ni lo, a neitu bik chi bil awm lo, Zo hnahthlak zawng zawngte ţawng, Zo hnahthlak zawng zawngte ta a ni. Mizoram chhunga inbiak pawhna atana Zo hnahthlak hrang hrangte’n kan hman mek ‘Mizo ţawng,’ kan tih hi ‘DUHLIAN TAWNG’ a ni e. Zofate rorelna pakhat hnuaia kan insuih khawmna atana kan hman tur pawh ‘Duhlian ţawng’ hi a ţha ber bawk a ni. Kum 1972-a U.T. kan nih hnu lawk aţang khan Duhlian ţawng chu, ‘Mizo ţawng,’ tia thlak a ni a, hei hian a huap zau loh avang leh Zo hnahthlak zinga mi tam tak ‘Zo,’ tia inkoh chu pawm thei si, ‘Mizo,’ inti ve thei lote rilru a lak hran theih avangin, ‘Duhlian ţawng,’ tia thlak let leh hram ni thei sela a duhawm ngawt mai. Chu mi lam hawi chuan kan state sawrkar hnarkaitute pawh hian an ngaihtuahna lo sengin uluk leh chik takin lo ngaihtuah nawn leh sela ka duh hle a ni. Chuti lo chuan kan hnam hi kan tlem tham naka laiin kan inchhawk ţhen palh ang tih a hlauhawm hlel lo e.