HNAM SAKHUA HI KHAWVEL HNAM TINTE SAKHUA A NI

                                             Rorelliana

           Mihring leh mihring indona hi Pathian dona a ni. Mihring leh mihring inremna hi Pathian nên inremna a ni.

CHUNGKHUANU

          Khawvêl hnam tin te, ni leh thla, arsi-te leh tuipui (tuifinriat) zau tak leh kan chênna khawvêl leh thil nung zawng zawng siama dintu chu Chungkhuanu a ni.

          Amah chuan nihphung fel tak a nei a, A taksa lantir dân erawh khawvêla thil awm tinreng ang hi a ni a. Thli mamawhtu hnênah thliin A inlantîr a, ruah mamawhtu hnênah ruahin A inlantîr a, ei tûr mamawhtu hnênah ei tûrin A inlantir a, chutiang zêl chuan khawvêla thil awm zawng zawng hmang hian A inlan thîn.

          Ani chuan hmuh loh leh hriat loh pakhat mah a nei lo a, a nihphung pumpui chu mi-tin a khat veka Amah chu hriatna hlawm a ni bawk a, chhûn leh zânin a hliah buai thei lo a, a hriatna chu eng lai mahin a muhil ngai hek lo, engkim ti theitu, thil awm lote awmtîr theitu, thil awm sate pawh tibo theitu chu a ni si a.

MIHRING

          Khawvêla hnam tinte hi engkim siamtu Chungkhuanu siamte kan ni vek a, mi pakhat thlah lo pung chho zêl kan ni lo a. Hnam tinte hi a hrana din vek kan ni a, tawng hrang hrang leh pianphunga nih dan hran nei nuk mah ila, Chungkhuanuin a duh taka a siamte vek kan ni.

          Kan lo chhuahnaah chuan bul hmun khat, Pathian 'Khuanu' atanga chhuak vek kan ni a, hnam thlan bik leh duh bik hnam a siam hrang reng reng lo. Kan zain Chungkhuanu atang chuan ang khat vek kan ni.

           Inrem taka awm leh intanpui tawnna hi siamtu Khuanu zia a ni a, mihring kan nihnaah hian kan hlut dân a inang vek a, hlu bik leh hlu lo bik kan awm reng reng lo. Mihring vânga lo awm finna te, hausakna te, thiamnate hi mihring chunga mi an ni lo a, mihring hnuaia mi vek an ni.

          Finna avanga mi mawl hmuhsit te, hausak avanga rethei hmuhsit te, thiamna avanga thiamna nei lo hmuhsitnate a lo awm chuan chumi chu mihring hlutna hre pha lo, mihring avânga lo awm ngaisang zâwktu chu a ni.

          Mihring lo piang rêng rêng hi an zain an zahawm em em vek a, chuvângin, tu mah i intina lo ang u, Chungkhuanu kutchhuak vek kan ni si a.

NUNNA

          Chungkhuanu hian mihring a siamte hi Nunna pahnih neiin a siam vek a, thi tawh zawng zawng leh tuna dam lai mek leh lo la piang tûr zawng zawngte nên nunna pahniha thuam vek kan ni.

NUNNA 1-NA CHU

          Tisa nunna hi a ni a, he tisa nunna hi chu khawvêl nunnate nen hian a inzawm tlat a, khawvêla kan hman tûr nunna a ni a, kan thawk theihna te, kan chet theihna te, ngaihtuah theihna rilrute nêna keng khâwm vek nunna hi a ni. Khawvêl nunna hip thei loin i ka leh hnar hmet ping la, i thi nghal thuai dâwn a ni, khawvêl nunna tel loin mahni chauhin a nun theih reng reng loh.

          Tisa nunna hi a hlu em em mai a, khawvêl piaha chhawm tel theih reng reng loh nunna a ni a, chuvângin, hlu tak leh tangkai taka kan hman tûr a ni. He tisa nunna hi kan zah em em tûr a ni a, mahni intihhlum te, mi dang nunna lâkte hi a thiang rêng rêng lo a, Khuanu remruat dodâlna leh pal chhiatna a ni.

          Tisa nunna hi khawvêl kan luah chhûnga thil hlu ber a ni a, tu mahin i intihchhiatsak lo ang u, intihchhiatsak chu Chungkhuanu pawi khawihna lian ber a ni.

NUNNA 2-NA CHU

          Engkim siamtu Chungkhuanu atanga chhuak nunna mihringin kan chan chu a ni, he nunna hi chu khawvêl nunna nên a inzawm ve lo a, Chungkhuanu atanga kan chan mihring mai ni loa Pathian Chungkhuanu kan nih vena nunna chu a ni.

          Thil lo awm chawpah hian chatuan nunna a awm lo a, chatuan chu engkim siamtu Chungkhuanu chu a ni a. Chungkhuanu chu nunna pakhat chauh nei a ni lo a, nunna chhiar sen loh neitu chu a ni.

          Chungkhuanu min pek chatuan nunna kha Chungkhuanu nihna famkima thuam, kan tisa hringnun dam laia kan chan, chatuan mi kan nih theihna nunna chu a ni, chu nunna kan chan chu kan tisa dam lai leh thih hnuah pawh danglam reng reng lo, chatuan nunna chu a ni.

          Chu chhûngnung nunnaah chuan hnam hrang, mi hrang kan awm tawh lo a, Chungkhuanu thlahte vek kan ni a, kan zain Pathian Lal fa kan ni vek a ni.

          Chu chhûngnung nunna chuan he khawvêl piah pialrâl chu chatuanin kan luah dawn a ni. Chutah chuan hnam hrang rêng rêng kan awm lo a, mihring thlah lam a tâwp a, Pathian Khuanu thlahte chauh kan awm ta a ni.

          Pialral-ah chuan mihring pakhat mah an awm lo a, Pathian hrin Pathiante chauh awmna a ni a, kan Pathian Khuanu nihnain pialral kan luah ta a ni.

          Pialral-ah chuan Pathian Khuanu kan nita mai em ni? I ti a ni ang e, ni mai lo, engkim siamtu Pathian Khuanu atanga chhuak, nunga chu kan ni zawk. Chatuan minung Nunna Lalhnam chu kan ni.

SAKHUA

          Thil nung zawng zawng hian sakhua an nei vek a, anmahni siamtu nêna an inzawmna kha an sakhua chu a ni. Anmahni siamtu duh dâna an awmna leh an lan chhuahna kha an sakhuana chu a ni.

          Khawvêla hnam tinte pawh hi min siamtu Pathian Chungkhuanu nêna kan inkawp tlatna leh kan inzawm tlatna hi kan sakhua chu a ni. Chungkhuanu duh dana kan awmna leh kan lan chhuahna hi kan sakhuana chu a ni.

          Hnarn min siam a, chênna tûr ram min pe leh a, kan ram leh kan hnam min siamtu inkawpah hian kan sakhua chu a famkim nghal. Ram leh hnam leh sakhua hi \hen hran theih loh, inkawp tlat a ni.

          Khawvêla hnam tinte siama dintu hi pakhat chauh a ni a, hnam hrang hrangin siamtu hrang hrang kan nei lo a, kan zaa siamtu hi Pathian Chungkhuanu chauh hi a ni.

          Chuvangin, khawvêl pumpui sakhaw tak chu pakhat chauh a ni a, Amahah chuan kan zain kan awm a, mahni ram leh hnam hmang \heuha kan biakin kan biaka ropuina a lang chhuak a ni.

          Pathian mi hman mihringa lo piang rêng rêng hi Pathian Khuanu anga cheibawla biak telna hian sakhaw pâwl hrang a siam \hin avangin min siamtuah chauh kan zain i innghat ang u, Pathian Khuanua chhuak kan ni vek si a.