THIL SIAM THU

            Judate Bible chu, keini’n “Thuthlung Hlui” kan tih hi a ni a. Bu 39 ṭhui khâwm niin kan ngâi a, Juda te erawh chuan bu 24 ah an siam thung. Keini’n bu 2 bu 3-a kan neihte hi bu khatah an siam niin an sawi.

        Thuthlung Hluia thu ziak chuang hmasa ber chu, Tuipui sen an kâna Miriami hla Exodus 15:21 leh Debori hla Roreltu  bung 5 ami hi niin zir miten an sawi a. Ziak hmasak lam aṭanga sawi ṭan chuang lovin, Genesis aṭang hian en ṭan mai i la.

          a) Êng siam thu. Genesis 1:3-5. ah chuan 3Tin, “Pathianin ‘Êng lo awm rawh se’ a ti a, tichuan êng a lo awm ta mai a. 4Tin, Pathianin eng chu a ena, ṭha a ti hle a: tichuan, Pathianin eng leh thim chu a ṭhen ta a. 5Tin, Pathianin eng chu ‘chhun’ a vuah a, thim chu ‘zan’ a vuah a. Tichuan, tlai lam a awm a, zing lam a awm bawk a, a ni khatna chu”. tih kan hmu a. 

SAKHAW CHUNGCHANGA INKAWMNA - 10

78. Zawhna   : Kan Mizo pipute hian eng ang Pathian nge an lo biak réng le? ṭhenkhat sawi dân hian ramhuai leh thingbul lungbul te be mai mai, sakhaw mumal pawh nei lo niin ka lo hria a?

    Chhanna   : Kan pi leh pute sakhua hi a mumal ber zawk ang chu. Mingoho khan kan pi leh pute kha ramhuai te, thingbul te leh lungbul te be vel mai mai, sakhaw mumal pawh nei lo niin an sawi a, chu chu kan hnam mi fing deuh leh hruaitu hmasa, mingo ngaihsanna khatho khan an lo awih ve ngawt mai a. Khati anga kan pi leh pute puh chhe em emtute mingo zawk hi a nia, sakhaw nei mumal lo zawk chu.

                                      Mingoho khuan  an rama Kristianna a luh khân an zawm puk a, hun rei tak Kristian an nih tawh avangin tun hma an pi leh pute khan eng sakhua nge an neih pawh an hre tawh lo. Kristianah an lut deuh duak a, an ram rorelna sanga Parliament member ni tur pawhin, Kristian a nih loh chuan M.P an nih theih lohna dan te an nei hial a ni. Tunah Kristian an beidawng a, an hnam sakhua a ni lo tih te an hre chho a, Kristianna aṭangin an bâng a, sakhaw zawm  tur mumal an hnamin a hre chuang si lo a, a ṭhen Hinduism an ni a, a ṭhen  Islam an ni a, chuti ang zelin an hnamin sakhaw mumal an nei lo zawk a ni. “Mi lu la hnam” te an ti a. Hnam reng reng an pi leh pu hunah mi lu la hnam lo chu an vang ang. Israel-ho pawh an indo khan Davida chuan Goliatha lu a la a ni. Mingoho pawhin Red Indian nena an indo pawhin an lu an la. Mi hnam awm hle hle lai, an mahni an rawn do pawh ni si lo; an ram an va luah sak a, a ram neituten an ram an lo hauh vena lamah an indo phah a; “Min tibuai,” tiin a va tibuaitu zawkin anmahni tibuai angin an lehpuh hlauh a. Red Indian an thah lu vun an hihsak a, an kalsan a. Red Indian-hoin an chet dan an hmuh chuan phuba lain an tih ang khan mingo an va thahte lu vun an hik a, an kalsan leh a. “Red Indian-ho chu lu vun hih hmang,” tiin an sawi leh ta a ni.

KRISTIANNA LEH ZOFATE

       Zofate hi kan pipute sakhua kalsanin kum za nufa zet chu tûna a tam berin kan vawn mêk Kristiannaah hian nghet takin kan awm rih a ni a; tûna India ram state pakhat ni ve mek Mizoramah phei chuan Zofa zâa za deuh thaw Kristian kan ni a. Mizoram pawn lam thlir erawh chuan Zo hnahthlâk zîngah Kristianna aṭanga pipute sakhuaa kir leh te, Kristian atâna siam mêk te leh Kristian la ni ngai rêng rêng lo te pawh an awm niin a lang.

        Eng pawh ni sela, kan ṭobul takah chuan Kristian chu kan ni hauh lo a ni tih erawh chu tuma’n kan ringhlel awm lo e, chutih rual chuan kan sakhaw biak tak erawh chu eng ang nge a nih tih lam erawh chiang taka hriatna nei chu kan tlêm hle ang. Kum 1984, Pawltlak Thla (Jan) ni 11-ah khan Mingo Missionary hnathawk pahnih chuan tûna Mizoram nita hi an lo thleng a, Mizo lalte chu Kristiana siam mai theih mi an la ni lo hle a. Sailo lal zînga dam rei bera an sawi Savunga pawh khawthlang lama a awm tawh hnuin kum 120 mi niin a la dam a, Mingo pahnihte chuan chuti taka Sailo lal dam rei chu a hmel hmu châkin an zu tlawh a, in chhûng an luh ṭan phat chuan Savunga chuan amah hmun tuma lo kalte chu, “Mingo in ni maw?” a han ti a. Anni pahnih chuan, “Ni e,” tia an han chhan chuan Savunga chuan, “Ka be peih hlawm lo a che u,” tiin kawmchar lamah a pheisan daih niin an sawi.

PATHIAN MITEAH RAMHUAI(SETANA) HIAN TIHTHEIH ENGMAH A NEI LO

“Ka tana naber chu ka pa hmangaihna a ni  

           Hringnun hian a dawl love,  

           Hmangaihna, Lal hmangaihna hi”   

     

       Leilung khawvel luahkhat tura Pathianin hnam tinte a din hian kan pianphung leh sukthlek, zei leh zia culture chitin nen malsawmin min thuam nghal vek a. Chu bakah duh thlan theihna finna, a chhia, a ṭha hre theiin min thuam a. Chhuan hmasa ral zela chhuantharten ram chu an luah zel nan “THIHNA” thlengin a malsawmna chu a hun tlang a. Tichuan, kan hmaah hian vanneihna leh vanduaina, hausakna leh retheihna, natna leh damna, hlimna leh lungngaihna, finna leh atna, nawmsak leh retheihna te, hlawhtlinna leh hlawhchhamna leh engkimin min hualvel tlat a. Lal remruat loh thil thleng reng a awm ngai lo chatuan pa ruatsaah kan cheng vek a ni. Engkim mai hi chugkhuanu siam leh din vekte an ni a. amah hi hmangaihna Pathian a nih avangin amah avanga awm thil tinrengte, kan tawn mek leh kan la tawn tur zawng zawng pawh Pa hmangaihna vek a ni tih hriain i chawl thiam ang u.

SAKHAW CHUNGCHANGA INKAWMNA - 9

68. Zawhna   : Isua chanchin hi kum 12 a nih aṭanga kum 30 a nih inkar hi Bible-ah a awm lo an ti a, kha mi hun chhung khan hmun dangah a awm tihna em ni?

    Chhanna   : E! ka hre lo le. Mi ṭhenkhat chuan Kashmir ram velah te hian Isua hi a chetla hle ni tein an sawi a, nupui te neiin fa pawh nei deuh duaha sawi thawm a awm a ni. Ziak ṭhenkhatah pawh, Japan ramah a kal a, nupui te neiin fa pawh a nei a, a bo leh ta daih nia sawi thawm pawh a awm bawk. Engpawh ni se kei chuan Isua hi min tlantu tura lo kalah ka ruat lo a, an thlahtu bawhchhiatnaah ka tel bawk lo a, an thlah zingah ka tel lo tlat a.

69. Zawhna : A nih loh leh eng sakhua nge kan biak tak ang le? Kristianna kan zui si loh a, Muslim kan zui bawk si loh a, Judaism kan vawn bawk si loh chuan?

    Chhanna   : Khawvel hnam tin hnenah hian Pathian chuan thu a sawi a, Amah chu an hnenah a inpuang vek a ni tih hi rin ngam tur a ni. Hnam tin hi an pi leh pute hnenah Pathian a inpuan avangin keini Zofate pawh kan pi leh pute hnenah engkim siamtu Pathian chuan thu a sawi a, a inpuang a ni. Chu Pathian chu KHUA a ni a. Vana awm a nih avangin kan pipute chuan, “Pu Vana,” an ti a ni. chu chu kan pi leh pute’n an lo biak ṭhin chu a ni.

BIBLE HI JUDA HO CHANCHIN LEH AN HNAM A KAIHHRUAI DAN ZIAHNA A NI

Bible hi kan sawi tawh angin Evi leh Adama aṭanga Juda(Israel)chanchin ziahna bu liau liau a ni a,in enchiang teh ang.

Bible a Genesis an tih hi in chhui hmasa phawt teh ang,Genesis ziaktu hi Mosia a ni a,Mosia hi kan hriat angin Aigupta Lalram chhungah Lal fapa nihna changin engkim finna zirin a awm a, amah hi Israel hnam thinlung pumi tak a ni a, Israel mi leh Aigupta mi an insual pawhin " tunge thiam zawk"pawh ti hmasa lova,_Aigupta mi zawk vawthlu duh khawpa hnam thinlung pumi a ni. Chutiang ang mi chuan khawvel bul in ṭan dan leh Evi leh Adama chanchin, ama pianhma kum 2000 hmalam chanchin hnam thinlung pu takin a rawn ziak ni hian a lang a ni. Chu chuan an hnam ropuina tur leh an chungnunna turin an hnam zia zawng zawngte chu Pathianah rawn pu lutin a rawn ziak zel niin a lang tlat a ni. In chhui chiang teh ang aw.

ZOFATE DIN CHHUAHNA KAWNGPUI

Kan tan Pathianin ro a rel:

Mihringte kan dam rei lohna chhan chu Pathian min siam dânah dam rei thei kan nih loh vâng a ni a, chhan dang a awm lo a, bawhchhiatna vâng a ni

Chuang hek lo. I taksa kha han zir chiang la, rei tak daih tûra siam a nih lohna i hre thei ang. Boruak ṭha hîp a, chaw leh tui hmang a, chumi ringa nung tûra siam chu kan ni. Chuvângin, boruak ṭha kan mamawh a, ei tûr ṭha kan mamawh a, tui in tûr kan mamawh bawk. Hengte hi an awm loh chuan kan nung thei to tih chu sawi tam ngai loin kan hre thei mai awm e. Heng kan

mamawh hrang hrangte hi mihringte hunbi neia kan nuntheihna atâna Pathian siam a ni a, kan mamawh ang zêlin min pe a ni.

Mihringte hi leilung luaha awm zêl tûr kan nih avangin chi thlah malsâwmnain min thuam a, kan inthlah chhâwng zêl a, kan upate erawh Chu an ral zêl a, ṭhang an lo thar zel a ni. Engtia rei nge mihringte hi khawvêlah inthlah chhâwnga leilung kan luah zêl dâwn kan hre lo. Pathian thu a ni a, Pathian chauhin a hria a ni. Tuia tla te, thingin a delh te, meiin a kan te, thinga tla te, natna tuarte hi thi thei lo ta se a râpthlâkin a va hrehawm dâwn em! Kan tâna ṭha tûrin Pathianin ro a rêl si a.

ZOFATE DIN CHHUAHNA KAWNGPUI

ZIAKTU THUHMA

"Zofate din chhuahna Kawngpui" tih thupuia hmang tur hian ngaihtuahna eng emaw chen ka hmang ṭhin a. Hnam kan ni tih hi a chiang a, chutih rual chuan khawvelah hian hnam dangte thuhnuaia kun a, an thiamna ringawt ring tur chu kan ni bik hleinem tih hi ka thinlungah a lutna hle mai a. Nimahsela, tih theih ka nei tlem bawk si a, a tih ngaihna dang ka hriat chuan loh avangin ziaka puan chhuah phawt mai chu ṭhain ka hre ta a ni. Hetiang hian ngaih pawimawh lai ziakin, thuin ka han tar lang ve ta a ni.

Thinlung leh tih tak zeta min lo chhiarsak turin Zoram mipuite ka chah duh a, chhawr ṭangkai tûr awm ang angte chhawr ṭangkai a nih theih nan tlawmngaia min lo chhiarsaktute chungah ka duhsakna sang ber ka hlan bawk a ni.

                                                                                              Puithiam Lalchangliana

                            Zo hnam

Phone:                                                      Dawrpui Vengthar

9612556259                                                     Aizawl

SAKHAW CHUNGCHANGA INKAWMNA - 8

56. Zawhna   : Chuti chu Israel thlah kan ni lo reng reng i tihna a ni maw?

    Chhanna  : Ni e, Israel thlah chu sawi loh, Adama thlah pawh kan ni ve lo a ni. A hmaa kan sawi tawh ang khan Israel thlah kan ni lo a, a chhan chu Israel ram chu B.C 722 kumah Assuria lal Salmanesser-a chuan runin a hneh a, salah a hruai bo ta hlawm kha a ni a. Chu mi hun hma daih B.C 770 kum emaw, a hnu lam hretah emaw Chinese mi thiamte’n a thlan an hai chhuah Zo mi ṭhapa emaw kha a thi tihna a ni a, chu chuan Israel hnam leh Juda hnam chu Kanan rama an la awm khawm vek lai pawh khan Mizo pi leh pute chu China ramah an lo awm daih tih a tichiang em em a ni.

                             Chu mai pawh a la ni lo a, kum tam tak kal ta B.C. 8000 vel laia Kom hnam chanchin ziaktu pakhat chuan mihring siam hla Pu Sobuia’n B.C 2000 kum vela a lo phuah a tarlang nghe nghe a. Chu hla chu-

                             “Mi inthan ka hril tang ning la ja-ah,

                             A kung hrui chhui tang ning la ja-ah;

                             Minu leh mipa aw lei ranot sei a,

                             Mi inthawkna ti tang ning e ja-ah,”

                     tih a ni. He hla hi B.C. 2000 vela phuah a ni daih tawh si a, chung hunah te chuan Israel hming pawh a la awm lo a, an thlahtu, he hming petu ber Israel-a pawh a la piang lo reng reng a ni. Chu vang chuan Israel thlah chu kan ni lo chiang bal ti ila, kan tisual lo ang (Mizo Chanchin - Col. V. Lunghnema p. 210)

NU LEH PA CHUNGCHANG

1. Nu leh pa te hi kan tan eng nge an hlutna?

    = Siamtu Pathian ruat anga mihringa min siamtu, kan tana 

        Pathian hmuh theih an nihavangin an hlu em em  a ni.

      

2. Nu leh pa zah loh hi eng nge a pawina?

    = Nu leh pa zah loh hi Pathian zah lohna, vanduaina leh thlahte  

        thlenga anchhe dawntheihna a ni.

3. Nu leh pa zah hi eng nge a hlutna?

    = Nu leh pa zah hi Pathian thuawihna, hmuingilna leh thlate 
       thlenga vanneihna a ni.

4. Nu leh pa enkawl hi eng nge a tulna?

    = Nu leh pa te hi mihringa min dintu an nih avangin enkawl let an 

        ngaih huna enkawl let hianmahni leh Pathian laka kan chanvo 
        a ni.

       

5. Engtin nge nu leh pa kan zahna kan lantir ang?

    = Rinawmna leh dikna vawng chunga nu leh pa in tih tur leh tih 

        loh tur min hrilh te tha taka kan zawm hian  nu leh pa kan 
        zahna kan lantir a ni.

      

6. Nu leh pa zah lo chu tute nge ni?

    = Nu leh pa thuawih lo te, vin ching te, an hming duhdah taka 

        sawi mai mai te, mi bum leh thilruk ching te hi nu leh pa zah lo  

        an ni a, ram leh hnam, khawtlang tan mi hnawksak anni

       

7. Pi leh pute hi kan tan eng nge an hlutna?

    = Pi leh pu te hi mihring kan nih theihna tura kan bulpui, nu leh 

        pa min petu an nih avangin an hlu em em a  ni..